ތިން ސްކޫލެއްގެ އެކްސްޓެންޝަން މަސައްކަތް ކޮންޓްރެކްޓަރުންނާއި ހަވާލުކޮށްފި

ރާއްޖޭގެ ތިން ސްކޫލެއްގެ އެކްސްޓެންޝަން މަސައްކަތް ކޮންޓްރެކްޓަރުންނާއި ހަވާލުކޮށްފި އެވެ.

އެޑިއުކޭޝަން މިނިސްޓްރީއިން މިއަދު ކޮންޓްރެކްޓަރުންނާއި ހަވާލުކުރީ ކަލައިދޫ ސްކޫލުގެ 3 ކްލާސްރޫމާއި ސައިންސްލެބް އަދި ނަޑެއްލާ ސްކޫލުގެ 2 ކްލާސްރޫމް އަދި ސްޓާފްރޫމް ޢިމާރާތުގެ މަސައްކަތުގެ އިތުރުން ގއ. ނިލަންދޫ ސްކޫލުގައި 2 ކްލާސްރޫމް ޢިމާރާތް ކުރުމުގެ މަސައްކަތެވެ.

އެގޮތުން ގއ. ނިލަންދޫ ސްކޫލުގައި 2 ކްލާސްރޫމް ޢިމާރާތް ކުރުމުގެ މަސައްކަތް ޙަވާލުކޮށްފައިވަނީ ތިހްނާން އިންވެސްޓްމަންޓްއާއި އެވެ. މި މަސައްކަތް އެކުންފުންޏާއި ހަވާލުކޮށްފައިވަނީ 120 ދުވަަަސްތެރޭގައި ނިންމާގޮތަށް، 1,579,607.36 ރުފިޔާއަށެވެ.

ކަލައިދޫ ސްކޫލުގެ 3 ކްލާސްރޫމާއި ސައިންސްލެބް އަދި ނަޑެއްލާ ސްކޫލުގެ 2 ކްލާސްރޫމް އަދި ސްޓާފްރޫމް ޢިމާރާތުގެ މަސައްކަތް ހަވާލުކޮށްފައިވަނީ ރައިޒާ ޕްރައިވެޓް ލިމިޓެޑާއި އެވެ. އެކުންފުންޏާއި ލައިދޫ ސްކޫލުގެ މަޝްރޫޢަށް ހަވާލުކޮށްފައިވަނީ 4,923,318.19 ރުފިޔާއަށް، 150 ދުވަސް ތެރޭގައި މަސައްކަތް ނިންމާގޮތަށެވެ.

އަދި ނަޑެއްލާ ސްކޫލުގެ މަޝްރޫޢު ހަވާލުކޮށްފައިވަނީ 4,873,736.31 ރުފިޔާ އަށް، 150 ދުވަސް ތެރޭގައި ނިންމާގޮތަށެވެ.