ކުރީ ސަރުކާރުން ފެނަކަ އޮތީ ބަނގުރޫޓުވާ ލެވެލްއަށް ގެންގޮސްފައި - މުއާޒް

ކުރީ ސަރުކާރުން ފެނަކަ އޮތީ ބަނގޫރުޓުވާ ލެވަލްއަށް ގެންގޮސްފައިކަމަށާއި، މިހާލަތުން އަރައިގަނެ ހައްލުތައް ހޯދަމުންދާ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ މުއާޒު މުހައްމަދު ރަޝީދު ވިދާޅުވެއްޖެއެވެ.

މުއާޒް މިހެން ވިދާޅުވީ, ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ. މުއާޒް ވިދާޅުވީ, ގިނަ ދުވަސްތަކެއް ވަންދެން އަޅާނުލާ ހުރުމުގެ ސަބަބުން, ކުންފުނީގެ މެޝިނަރީޒްތައް ހުރީ ހަލާކުވެފައި ކަމަށެވެ. އަދި މިފަދަ ހާލަތެއްގައި ފެނަކަ އޮތް އިރު, ރަށްރަށަށް ކަރަންޓުގެ ޚިދުމަތް އެންމެ އެކަށޭނެ ގޮތަކަށް ފޯރުކޮށްދިނުމުގައި ދަތިތައް ހުރި ކަމަށެވެ.

މުއާޒު ވިދާޅުވީ ވަރަށް ކްރިޓިކަލް 17 ރަށެއް ފާހަގަކުރެވިފައިވާ ކަމަށާއި ސަރުކާރުގެ އެހީގައި އެ ރަށްރަށަށް ބޭނުންވާ ޖެންސެޓުތައް ހޯދުމުގެ މަސައްކަތްކުރަމުންދާ ކަމަށެވެ.

މުއާޒު ވިދާޅުވީ 40ވަރަކަށް ޖެންސެޓު މިރޯދަމަހުގެތެރޭ ހޯދާ ކްރިޓިކަލް ރަށްރަށަށް އެޖެންސެޓުތައް ފޯރުކޮށްދޭނެ ކަމަށެވެ.

ކުރީ ސަރުކާރުން އޮތީ ފެނަކަ އާއި މެދު ވަރަށް ބޮޑަށް އިހުމާލުވެފައި ކަމަށާއި، މިއީ ރައްޔިތުންނަށް އެންގެން ޖެހޭ ކަމެއް ކަމަށް މުއާޒު ވިދާޅުވިއެވެ.

މުއާޒު ވިދާޅުވީ ގޮންޖެހުންތައް ހުރި ނަަމަވެސް ސަރުކާރާއި ގުޅިގެން ހައްލުތައް ހޯދަމުންދާ ކަމަށެވެ.

ސަރުކާރު ވެރިކަމާއި ހަވާލުވިއިރު ފެނަކައިގެ ދަރަނި 4.3 ބިލިއަން ރުފިޔާއަށް އަރާކަމަށް މީގެ ކުރިން މުއާޒް ވިދާޅުވެފައިވެއެވެ. އަދި އެ ކުންފުންޏަށް 120 މިލިޔަން ރުފިޔާގެ ޢާމްދަނީއެއް ލިބުނުނަމަވެސް 8000 މުވައްޒަފުންނަށް ކޮންމެ މަހަކު 86 މިލިއަން ރުފިޔާ މުސާރައަށް ހޭދަކުރަންޖެހޭ ކަމަށް އޭނާ ވިދާޅުވިއެވެ.

ފެނަކައިން ކުރިއަށްގެންދާ މަޝްރޫޢުތަކާ ގުޅޭގޮތުން މުއާޒް ވިދާޅުވީ ފެނަކައިގެ އޮފީސް އެޅުމަށް ކުރިއަށް ގެންދިޔަ 60 މަޝްރޫޢަކަށް އެއް ބިލިޔަން ރުފިޔާ ޚަރަދުކޮށްފައިވީ ނަމަވެސް އެމަޝްރޫޢުތައް އޮތީ ހުއްޓިފައިކަމަށެވެ. އަދި މަޝްރޫއުތަކުގެ 45 އިންސައްތަވަރު ނިމިފައި ހުއްޓަސް، މަޝްރޫއުތައް އަލުން ކުރިއަށް ގެންދިއުމަށް ބިލިއަނެއްހާ ރުފިޔާ އިތުރަށް ބޭނުންވާ ކަމަށްވެސް މުއާޒް ފާހަގަކޮށްފައިވެއެވެ.