ތިނަދޫ ސިޓީ ކައުންސިލްގެ ޕީޕީއެމް/ޕީއެންސީ ކައުންސިލް މެމްބަރު ލިއުޝާގެ ތާއީދު އަބުޅޯއަށް!

ތިނަދޫ ސިޓީ ކައުންސިލްގެ ޕީޕީއެމް/ޕީއެންސީއަށް ނިސްބަތްވާ ކައުންސިލް މެމްބަރު އައިޝަތު ލިއުޝާ ޒުބައިރު، އަބްދުﷲ އަހުމަދު (އަބުޅޯ)އަށް ތާއީދުކޮށް ކެމްޕޭން ޓީމާ ގުޅިވަޑައިގެންފި އެވެ.

ތިނަދޫ އުތުރު ދާއިރާގެ މަޖިލިސް ގޮނޑިއަށް ވާދަކުރައްވާ ޖުމްހޫރީ ޕާޓީގެ ކެންޑިޑޭޓް އަބްދުﷲ އަހުމަދު (އަބުޅޯ) ގެ ކެމްޕޭން ޓީމާ ގުޅިވަޑައިގަތުމަށް ބުރާސްފަތި ދުވަހުގެރޭ ވަނީ ހާއްސަ ރަސްމިއްޔާތެއް ބާއްވާފައެވެ.

ތިނަދޫ އުތުރު ދާއިރާގެ އަބުޅޯ ކެމްޕޭން ޖަގަހައިގައި ކުރިއަށް ދިޔަ މި ރަސްމިއްޔާތުގައި ވާހަކަފުޅުދައްކަވަމުން ލިއުޝާ ވިދާޅުވީ، އޭނާ އަކީ ރައްޔިތުން އިންތިހާބުކޮށްފައިވާ މަންދޫބެއް ކަމަށާއި، ކަންކަން ނިންމުމުގައި އަބަދުވެސް އިސްކުރާނީ ރައްޔިތުން އެދޭގޮތަށް ކަމަށެވެ.

ލިއުޝާ އިތުރަށް ވިދާޅުވީ، މިއީ އަބުޅޯއާއެކު މަސައްކަތް ކުރާ ފުރަތަމަ ފަހަރުކަމަށާއި، އަދި ތިނަދު އުތުރު ދާއިރާގެ މަޖިލިސް ގޮނޑިއަށް އަބުޅޯ އިންތިހާބުކުރުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.

މި ރަސްމިއްޔާތުގައި ވާހަކަފުޅު ދައްކަވަމުން އަބުޅޯ ވިދާޅުވީ، އޭނާގެ ޓީމާ ލިއުޝާ ގުޅިވަޑައިގަތުމަށް ނިންމި ނިންމުމަކީ މުޅި ކެމްޕޭން ޓީމުން އުފަލާއެކު ބަލައިގަންނަ ކަމެއް ކަމަށާއި އަދި ޓީމަށް ލިބުނު އިތުރު ހިތްވަރެއް ކަމަށެވެ. އަދި ސިޔާސީ ދާއިރާގައި ކުރިއަށް ދިޔުމަށް އަބަދުވެސް ލިއުޝާއަށް ފުރިހަމަ އެއްބާރުލުން ދެއްވާނެ ކަމަށް އަބުޅޯ ވަނީ ވިދާޅުވެފައެވެ.

އަބުޅޯގެ ކެމްޕޭން ޓީމާ ގުޅިވަޑައިގަތް ލިއުޝާއަކީ މި ހިނގާ ކައުންސިލް ދައުރުގައި ތިނަދޫ ސިޓީ ކައުންސިލްގެ ކައުންސިލް މެމްބަރެކެވެ. އަދި ލިއުޝާ ވަނީ ޕީޕީއެމް/ޕީއެންސީގެ ތިނަދޫ އުތުރު ދާއިރާގެ މަޖިލިސް ޕްރައިމަރީގައިވެސް ވާދަކުރައްވާފައެވެ. މި އިންތިހާބު ލިއުޝާއަށް ނާކާމިޔާބުވި އިރު ލިއުޝާއާ ވާދަކޮށް އިންތިހާބު ކާމިޔާބުކުރި ކެންޑިޑޭޓުގެ ފަރާތުން މަލާމާތާއި ފުރައްސާރައާ ކުރިމަތި ކުރުވައި ބޭއަދަބީ ހުތުރު ބަހުން ލިއުޝާއާ މުއާމަލާތްކޮށްފައިވާކަމަށް ލިއުޝާގެ އާއިލާއިން ފާހަގަކޮށްފައިވެއެވެ.

އަބުޅޯ އަކީ 18 ވަނަ ރައްޔިތުންގެ މަޖިލީހުގައި ތިނަދޫ ދެކުނު ދާއިރާ ތަމްސީލްކޮށް ތިނަދޫގެ ތަރައްގީއަށް ބުރަ މަސައްކަތްތަކެއް ކޮށްދެއްވާފައިވާ މެމްބަރެކެވެ. އަދި ތިނަދޫގެ އިޖުތިމާއީ ރޫހު އާލާކުރުމަށްވެސް ގިނަ މަސައްކަތްތަކެއް ކޮށް ތިނަދޫގެ ޒުވާނުންނަށް ފަހި ފުރުސަތުތައް ހޯދައިދިނުމަށް ވެސް އަބުޅޯ ވަނީ ގިނަ މަސައްކަތްތަކެއްކޮށްދެއްވާފަ އެވެ. މިފަހަރު އަބުޅޯ ކުރިމަތިލާފައިވަނީ އަބުޅޯގެ އުފަން ދާއިރާ ތިނަދޫ އުތުރު ދާއިރާއަށެވެ.