މީގެ ކުރިން ރާއްޖޭގައި ބޭއްވި އިންތިހާބެއް
ކުރިޔަށް އޮތް ރައްޔިތުންގެ މަޖިލީހުގެ އިންތިހާބަށް ރީރަޖިސްޓްރީކުރުމަށް ދޭ އިތުރު ފުރުސަތު އަވަސްކުރުމަށް އީސީއިން ނިންމައިފި އެވެ.
މަޖިލިސް އިންތިހާބު އަންނަ މަހަށް ފަސްވުމާއި ގުޅިގެން އީސީއިން ފުރަތަމަ ނިންމީ މިމަހުގެ 14 ވަނަ ދުވަހު ރީރަޖިސްޓްރޭޝަނަށް ހުޅުވާލަންށެވެ. ނަމަވެސް އީސީއިން މިއަދު ވަނީ ރީރަޖިސްޓްރޭޝަނަށް އަންނަ އާދީއްތަ ދުވަހު ހުޅުވާލަން ނިންމާފައިވާކަން ހާމަކޮށްފައި އެވެ.
އީސީގެ އިސް އޮފިޝަލަކު ބުނީ ރީރަޖިސްޓްރޭޝަނަށް ހުޅުވާލުން އަވަސްކުރަން ނިންމީ 14 ވަނަ ދުވަހު ރީރަޖިސްޓްރޭޝަނަށް ހުޅުވާލައިފި ނަމަ ރީރަޖިސްޓްރީވާން ލިބެނީ 3 ދުވަސްކަމުން އެކަމުގެ ކަންބޮޑުވުންތައް އީސީއަށް ލިބުމާއި ގުޅިގެން ކަމަށެވެ. މިއާއި އެކު މިމަހުގެ 10 ވަނަ ދުވަހަށް ރީރަޖިސްޓްރޭޝަން އަވަސްކޮށް މިމަހުގެ 16 ވަނަ ދުވަހުގެ ނިޔަލަށް ރީރަޖިސްޓްރީ ވުމުގެ ފުރުސަތު ލިބިގެންދާނެ ކަން އޮފިޝަލް ބުންޏެވެ.
އިންތިހާބުތަކާ ބެހޭ އާންމު ގާނޫނަށް މަޖިލީހުން ބަދަލު ގެނެސް ގެނެވުނު އިސްލާހު ރައީސުލްޖުމްހޫރިއްޔާ ތަސްދީގު ކުރެއްވުމުން ކުރިން ވޯޓުލަާން އޮތް މިމަހުގެ 17 ވަނަ ދުވަހުގެ ބަދަލުގައި އަންނަ މަހުގެ 21 ވަނަ ދުވަހު އިންތިހާބު ބޭއްވުމަށް އީސީއިން މިހާރު ވަނީ ނިންމާފައި އެވެ.
އީސީއިން ބުނީ 21 އޭޕްރީލްގައި އިންތިހާބު ބޭއްވުމަށް ނިންމުމާއެކު އަލަށް 560 ފަރާތަކަށް 18 އަހަރު ފުރި ވޯޓުލުމުގެ ހައްގު ލިބޭ ކަމަށެވެ.
ފަހުގެ
