ޤާނޫނުގައިވާ ކަންކަން ފުރިހަމަކުރެވޭނީ އޭޕްރީލް 21 ވަނަ ދުވަހު އިންތިހާބު ބާއްވައިގެން - އިލެކްޝަންސް

ރައްުޔިތުންގެ މަޖިލީހުގެ އިންތިހާބު އަންނަމަހުގެ 21 ވަނަ ދުވަހު ބާއްވަން ނިންމީ، އެމަހުގެ 28 ވަނަ ދުވަހުގެ ކުރިން އިންތިހާބާއި ގުޅޭ ހުރިހާ މަސައްކަތެއް ފުރިހަމަކޮށް ނިންމަން ޤާނޫނުތަކުގައި ލާޒިމްކޮށްފައިވާތީކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

އިލެކްޝަންސް ކޮމިޝަނުން މިހެން ވިދާޅުވީ އޭޕްރީލް 21 ވާ އާދީއްތަދުވަހު އިންތިހާބު ބޭއްވުމަށް ނިންމުމާއި ގުޅިގެން ބައެއް ފަރާތްތަކުން އުފައްދާ ސުވާލުތަކާއި ގުޅިގެނެވެ.

މިމަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބު އަންނަމަހުގެ ވިހި ވަނަ ރައްޔިތުންގެ މަޖިލީހުގެ މެންބަރުން ވަނަ ދުވަހަށް ލަސްކުރީ އިންތިހާބުތަކާބެހޭ އާއްމު ޤާނޫނަށް ގެނައި އިސްލާހަކާއި ގުޅިގެނެވެ އިންތިހާބު ބާއްވަން ނިންމެވި ދުވަސް ރަމަޟާން މަހާއި ދިމާވާތީ، އެކަމަށް ހައްލު ގެނައުމަށް ގެނައި އިސްލާހުގެ ސަބަބުން މީގެފަހުން އެއްވެސް އިންތިހާބެއް ރޯދަމަހާއި ދިމާވެއްޖެނަމަ، އެ އިންތިހާބެއް ބޭއްވޭނީ ރޯދަމަސް ނިމޭތާ 10 ދުވަސް ފަހުންނެވެ. އެހެންކަމުން އިލެކްޝަންސް ކޮމިޝަނުން ވަނީ އަންނަމަހުގެ 21 ވަނަ ދުވަހަށް ރައްޔިތުންގެ މަޖިލީހުގެ އިންތިހާބު ފަސްކުރައްވާފައެވެ.

އާއްމުކޮށް ރާއްޖޭގައި ބޮޑެތި އިންތިހާބުތައް ބާއްވަމުން ދިޔައީ ހޮނިހިރުދުވަހު ނަމަވެސް، އިންތިހާބު ބޭއްވުމަށް ކަނޑައެޅި އަންނަމަހުގެ 21 ވަނަ ދުވަހަކީ އާދީއްތަދުވަހަކަށްވުމުން ބައެއް ފަރާތްތަކަށް އަންނަނީ ސުވާލު އުފައްދަމުންނެވެ.

އިލެކްޝަންސް ކޮމިޝަނުން ވިދާޅުވީ މިހާރު ހިނގަމުންދާ 19 ވަނަ މަޖިލީހުގެ 5 އަހަރުގެ ދައުރު އަންނަ މޭމަހުގެ 28 ވަަނަ ދުވަހަށް ހަމަވާނެކަމަށެވެ. އަދި އެ ދައުރު ހަމަވުމުގެ 30 ދުވަސް ނުވަތަ އޭޕްރީލްމަހުގެ 28ގެ ކުރިން އިންތިހާބު ބާއްވައި، އެކަމާއި ގުޅޭ ހުރިހާ ކަމެއް ފުރިހަމަކުރަންޖެހޭއިރު، ޤާނޫނަށް ގެނައި އިސްލާހުގެ ސަބަބަުން ރޯދަމަހަށްފަހު އެންމެ އަވަހަށް އިންތިހާބު ބޭއްވޭން އަންނަނީ އޭޕްރީލްމަހުގެ 21 ވަނަ ދުވަހުކަމަށެވެ.

އިލެކްޝަންސް ކޮމިޝަނުން ވިދާޅުވީ އިންތިޚާބު ބޭއްވުމަށް އިލެކްޝަންސް ކޮމިޝަނުން ވާންޖެހޭ ތައްޔާރީތައް ކޮމިޝަނުން މިހާރު ކުރިއަށްދާކަމަށެވެ. އަދި އިންތިހާބު ބޭއްވުމަށް ނިންމި ތާރީހު ސަރުކާރު ބަންދުދުވަހަކާއި ދިމާވާތީ އެ ދުވަސް ބަންދު ދުވަހެއްގެ ގޮތުގައި ކަނޑައަޅައިދެއްވުމަށް ސަރުކާރުގައި ދަންނަވާފައިވާކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.