21 އޭޕްރީގައި އިންތިޚާބު ބާއްވަނީ މިހާރު އޮތް މަޖިލީސް އުވުމުގެ 1 މަސް ކުރިން އައު މަޖިލިސް ނުހޮވިދާނެތީ - ފުއާދު

20 ވަނަ ރައްޔިތުންގެ މަޖިލީހުގެ އިންތިޚާބު 21 އޭޕްރީލްގައި ބާއްވަން ނިންމާފައިވަނީ, މިހާރު އޮތް މަޖިލީސް އުވުމުގެ 1 މަސް ދުވަސް ކުރިން އައު މަޖިލިސް ނުހޮވިދާނެ ކަމަށް ފެންނާތީ ކަމުގައި އިލެކްޝަންސް ކޮމިޝަންގެ ރައީސް ފުއާދު ތައުފީޤް ވިދާޅުވެއްޖެއެވެ.

21 އޭޕްރީލްވާ ދުވަހަކީ އާދީއްތަ ދުވަހެކެވެ. ފުއާދު މިހެން ވިދާޅުވީ, މީގެ ކުރިން އިންތިޚާބުތައް ބާއްވަމުން ގެންދަނީ ހޮނިހިރު ދުވަސްތަކުގައި ކަމަށް ވުމުން މިފަހަރުގެ އިންތިޚާބު އާދީއްތަ ދުވަހަކާ ދިމާވާތީ މީހަކު އެކްސްގައި ކުރި ސުވާލަކަށް ޖަވާބުދެއްވަމުންނެވެ.

ފުއާދު ވިދާޅުވީ, 21 އޭޕްރީލް ގައި އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ ރޯދަމަސް ނިމިގެން 10 ދުވަސް ދިނުމަށްފަހު ލިބޭ ފުރަތަމަ ދުވަސް ކަމަށްވާތީކަމަށެވެ. އަދި އިތުރަށް ލަސް ކޮށްފި ނަމަ ގާނޫނުގައިވާ ގޮތަށް މިހާރު އޮތް މަޖިލިސް އުވުމުގެ 1 މަސް ކުރިން އައު މަޖިލިސް ނުހޮވިދާނެ ކަމަށް ފެންނާތީ ކަމަށްވެސް ފުއާދު ވިދާޅުވިއެވެ.

އިލެކްޝަންސް ކޮމިޝަނުން އެންމެ ފުރަތަމަ މަޖިލިސް އިންތިޚާބު ބޭއްވުމަށް ނިންމީ މިމަހުގެ 17 ވަނަ ދުވަހުއެވެ. ނަމަވެސް 17 ވަނަ ދުވަހަކީ ރަމަޟާން މަހުގެ ދުވަހަކަށް ވުމުން އިދިކޮޅު އެމްޑީޕީ އާއި ޑިމޮކްރެޓްސް އިން ވަނީ އިންތިޚާބުތައް ރަމަޟާން މަހުގެ ދުވަހަކާ ދިމާވާނަމަ ފަސްކުރުމަށް ގާނޫނަށް ބަދަލުތަކެއް ގެނެސްފައެވެ.

އަދި ގާނޫނަށް ގެނައި ބަދަލު މަޖިލީހުން ފާސްކުރުމަށްފަހު އެ ބިލު ތަސްދީގުކުރެއްވުމަށް ރައީސުލްޖުމްހޫރިއްޔާއަށް އެންމެ ފުރަތަމަ ފޮނުއްވުމުން ރައީސް ޑރ މުޙައްމަދު މުޢިއްޒު ވަނީ އެ ބިލު ތަސްދީގު ނުކޮށް އަނބުރާ ފޮނުވާލާފައެވެ. ނަމަވެސް މަޖިލީހުން އަނެއްކާވެސް އެބިލު އެ އޮތްގޮތަށް ފާސްކޮށް ތަސްދީގުކުރުމަށް ފޮނުއްވުމުން ރައީސް ވަނީ އެބިލު ތަސްދީގުކުރައްވާފައެވެ.