ތަރައްގީއަށް އިންވެސްޓުކުރާ ފައިސާ ހޭދަކުރަން ޖެހެނީ މޫސުމީ ކާރިސާތަކުން އަރައިގަތުމަށް - ޒަމީރު

ރާއްޖެފަދަ ކުދި ޖަޒީރާ ޤައުމުތަކުން ތަރައްޤީއާއި ކުރިއެރުމަށް އިންވެސްޓްކުރަން ހުންނަ ފައިސާ ހޭދަކުރަންޖެހެނީ މޫސުމަށް އަންނަ ބަދަލުތަކުން ލިބޭ ގެއްލުންތަކުން އަރައިގަތުމަށްކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ 60 ވަނަ މިއުނިކް ސެކިއުރިޓީ ކޮންފަރެންސްގެ ތެރެއިން ކުރިއަށްދިޔަ މަތީ ފެންވަރުގެ ޕެނަލް ޑިސްކަޝަނެއްގައި ވާހަކަފުޅު ދައްކަވަމުންނެވެ.

މޫސުމަށް އަންނަ ބަދަލުތަކުން ލިބޭ ގެއްލުންތަކަށް މާލީ އެހީތެރިކަން ފޯރުކޮށްދިނުން އަވަސްކުރުމާއި ގުޅޭގޮތުން ކުރިއަށްދިޔަ ޕެނަލް ޑިސްކަޝަންގައި ވާހަކަފުޅު ދައްކަވަމުން ޚާރިޖީ ވަޒީރު މޫސާ ޒަމީރު ވިދާޅުވީ ރާއްޖެފަދަ ތަރައްޤީވަމުން އަންނަ ކުދި ޖަޒީރާ ޤައުމުތަކަށް މޫސުމީގޮތުން ދިމާވާ މައްސަލަތަކުގެ ނުރައްކާ ބޮޑުވަމުން އަންނަކަމަށާއި، އަދި އެކަންކަމުން އަރައިގަތުމަށް ކުރާ ހޭދަވެސް އިތުރުވަމުންދާކަމަށެވެ.

އަދި އެކަންކަމަށް ހޭދަކުރާ ފައިސާއަކީ ސިއްހީ ދާއިރާއާއި ތައުލީމީ ދާއިރާގެ ތަރައްޤީއަށް އިންވެސްޓްކުރެވޭނެ ފައިސާކަމަށްވެސް ވަޒީރު ވިދާޅުވިއެވެ. އެހެންކަމުން މޫސުުމަށް އަންނަ ބަދަލުތަކުން އަރައިގަނެ، އެކަންކަމަށް ތައްޔާރުވުމަށް ކުރާ ހޭދަ ކުޑަކުރުމަށް ބައިނަލްއަޤްވާމީ ނިޒާމެއްގެ ތެރެއިން މާލީ އެހީތެރިކަން ފޯރުކޮށްދިނުން މުހިއްމުކަންވެސް ވަޒީރު ފާހަގަކުރެއްވިއެވެ.

ވަޒީރުގެ ވާހަކަފުޅުގައި ވަނީ ރާއްޖޭގެ ރަށްރަށަކީ މަދު އާބާދީއެއްގެ މައްޗަށް އެކުލެވޭ އެތައް ރަށެއްގެ މައްޗަށް ބިނާވެފައި އޮތް 5 ލައްކައެއްހާ މީހުންގެ އާބާދީއެއް އޮންނަ ކުޑަ ޤައުމަކަށްވުމުން، ތަރައްޤީގެ މަޝްރޫޢުތައް ހިންގަން މާލީ އިދާރާތަކުން ފައިނޭންސް ހޯދުމަކީ ދަތިކަމެއްކަން ފާހަގަކުރެއްވިއެވެ. އެހެންކަމުން ކުދި ޖަޒީރާ ޤައުމުތަކަށް ބޭންކުތަކުން ފައިނޭންސް ދޫކުރާ އުސޫލުތައް ބަދަލުކުރުމާމެދު ވިސްނަންޖެހޭކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ މޫސުމަށް އަންނަ ބަދަލުތަކުން ލިބޭ ގެއްލުންތަކަކީ އަޅުގަނޑުމެންގެ ހިތްވަރު އެލުވާލައި، ފަހަތަށް ޖެހޭނެ ސަބަބެއް ނޫންކަމަށެވެ. އަދި މިއީ މިދިޔަ 4000 އެއްހާ އަހަރު ދިވެހިން އުޅެމުންދިޔަ ވަޒަންކަމަށާއި، މި ވަޒަން ދޫކޮށްލާފައި ދިއުމުގެ ބަދަލުގައި މިކަމުން އަރައިގަތުމަށް ރާއްޖެއަށް ކުރެވެން އޮތް މަސައްކަތެއް ކުރާނެކަމަށްވެސް ވަޒީރު ވިދާޅުވިއެވެ. އެގޮތުން އިއާދާކުރަނިވި ހަކަތަ ބޭނުންކުރާ މިންވަރު މިހާރަށްވުރެ އެތައް ގުނައެއް އިތުރުކުރުމާއެކު، މޫސުމީ ކާރިސާތަކުން ލިބޭ ގެއްލުން ކުޑަވާނޭގޮތަށް ތިމާވެއްޓާއި ރަށްޓެހި ރަށްތައް ތަރައްޤީކުރުުމުގެ މަސައްކަތްވެސް ރާއްޖެއިން ކުރަމުންދާކަން މިނިސްޓަރ ފާހަގަކުރެއްވިއެވެ.

ވަޒީރުގެ ވާހަކަފުޅުގައި މިކަންކަމަކީވެސް މާލީގޮތުން ހޭދަތަކެއް ކުރަންޖެހޭ މަސައްކަތްތަކެއްކަން ފާހަގަކުރައްވަމުން ވިދާޅުވީ، ރާއްޖެފަދަ ޤައުމުތަކަށް މޫސުމަށް އަންނަ ބަދަލުތަކުން އަރައިގަތުމަށް ދޭ މާލީ އެހީތެރިކަން އަވަސްކޮށް، އިތުރުކުރަންޖެހޭކަމަށެވެ.

މޫސުމަށް އަންނަ ބަދަލުތަކުން ލިބޭ ގެއްލުންތަކަށް މާލީ އެހީތެރިކަން ފޯރުކޮށްދިނުން އަވަސްކުރުމާއި ގުޅޭގޮތުން ކުރިއަށްދިޔަ ޕެނަލް ޑިސްކަޝަންގައި ޚާރިޖީ ވަޒީރު މޫސާ ޒަމީރުގެ އިތުރުން، ބަންގްލަދޭޝްގެ ބޮޑުވަޒީރު ޝައިހް ހަސީނާއާއި، ބާބެޑޮސްގެ ބޮޑުވަޒީރު މިއަރ އަމޯރ މޮޓްލޭ އަދި އެމެރިކާގެ ރައީސްގެ ކްލައިމެޓް އެންވޯއީ ޖޯން ކެރީވެސް ބައިވެރިވެވަޑައިގެންނެވިއެވެ.