މެއި 10ގެ ނިޔަލަށް ހުރިހާ ސިފައިން ބާލަން އިންޑިއާއިން އެއްބަސްވެއްޖެ

މިއަހަރުގެ މެއިމަހު 10ވަނަ ދުވަހުގެ ކުރިން ރާއްޖޭގައި ގާއިމްވެތިބި އިންޑިއާ ސިފައިން އަނބުރާ އެގައުމަށް ގެންދިޔުމަށް އިންޑިއާއިން އެއްބަސްވެއްޖެ އެވެ.

މިއަދު އިންޑިއާގެ ވެރިރަށް ދިއްލީގައި ކުރިއަށް ދިޔަ ދެގައުމުގެ މަޝްވަރާގެ ބައްދަލުވުމަށްފަހު ހާރިޖީ ވުޒާރާއިން ނެރުނު ނޫސްބަޔާނެއްގައި ބުނެފައިވަނީ، އިންޑިއާއިން ރާއްޖޭގައި އޮޕަރޭޓު ކުރަމުން އަންނަ ތިން އުޅަނދުގެ ތެރެއިން އެއް އުޅަނދުގައި ހަރަކާތްތެރިވާ ސިފައިން މާޗް 10ގައި ފޭބުމަށް އިންޑިއާއިން އެއްބަސްވެފައިވާ ކަމަށެވެ.

އަދި އެހެނިހެން އުޅަނދުތަކުގައި ތިބި ސިފައިން މެއި 10 ގައި ބާލާނެ ކަމަށް އިންޑިއާއިން އެއްބަސްވެފައިވާ ކަމަށް އެބަޔާނުގައި ބުނެފައިވެއެވެ.

އަދި މި ބައްދަލުކުރެއްވުމުގައި، ދިފާއީ އަދި ސަލާމަތީ ދާއިރާއިން ގުޅުން ބަދަހިކުރުމާއި، އިގްތިސާދީ އަދި ތަރައްޤީގެ ދާއިރާއިން ދެޤައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާކުރެއްވި ކަމަށްވެސް ހާރިޖީ ވުޒާރާއިން ވިދާޅުވިއެވެ.

މި މަޝްވަރާއަށް އުފައްދާފައިވާ ދެގައުމުގެ ހައިލެވެލް ކޯ ގްރޫޕުގެ ތިންވަނަ ބައްދަލުވުން ފެބްރުއަރީ މަހުގެ ފަހު ހަފުތާގެ ތެރޭގައި ދެ ފަރާތުން އެއްބަސްވާ ތާރީޚެއްގައި މާލޭގައި ބޭއްވުމަށް ވަނީ އެއްބަސްވެފައެވެ.