ސިފައިން ބޭލުމުގެ މަޝްވަރާއަށް ދިވެހި ވަފުދެއް އިންޑިއާ އަށް!

ރާއްޖޭގައިތިބި އިންޑިއާ ސިފައިން ބޭލުމުގެ މަޝްވަރާއަށް ދިވެހި ވަފުދުން އިންޑިއާއަށް ފުރައިފި އެވެ.

މިކަމުގެ މަސައްކަތް ކުރުމަށް ދެގައުމުގެ މަތީ ފަންތީގެ ބޭފުޅުން ހިމެނޭ 'ކޯ ގްރޫޕް' އެއް ވަނީ އެކުލަވާލެވިފައެވެ. އަދި މި މަޝްވަރާގެ ފުރަތަމަ ބައްދަލުވުން ބާއްވާފައިވަނީ މިދިޔަ މަހުގެ 14 ގައި ރާއްޖޭގައެވެ. އަދި ދެވަނަ ބައްދަލުވުން ބާއްވަން ނިންމާފައިވަނީ އިންޑިއާގައެވެ.

މިއީ ރައީސް ޑރ. މުޙައްމަދު މުޢިއްޒު އިންޑިއާގެ ބޮޑުވަޒީރާ އެކު މިދިޔަ އަހަރު ޑިސެމްބަރު މަހު ދުބާއީގައި ބޭއްވެވި ބައްދަލުކުރެއްވުމުގައި، ދެ ލީޑަރުން އެއްބަސްވެވަޑައިގަތް ގޮތަށް އެކުލަވައި ލާފައިވާ ހައި ލެވެލް ކޯ ގްރޫޕުގެ ބައްދަލުވުން ތަކެވެ.

ރާއްޖޭގެ ފޮރިން މިނިސްޓްރީން ބުނީ، ރާއްޖެއާ އިންޑިއާއިން މަޝްވަރާކުރަން ޖެހޭ ކަންކަމާއި ގުޅިގެން މިއަދު ނިއު ދިއްލީގައި ކުރިއަށްދާ ހައި ލެވެލް ކޯ ގްރޫޕުގެ ދެ ވަނަ ބައްދަލުވުމުގައި ދެ ގައުމުގެ އިސް އޮފިޝަލުން ބައިވެރިވެވަޑައިގަންނަވާނެ ކަމަށެވެ.

ރާއްޖޭގައި ތިބި އިންޑިއާ ސިފައިން ފޮނުވާލުމަކީ ރައީސް ޑރ. މުހައްމަދު މުއިއްޒު ގެ ރިޔާސީ ވައުދެކެވެ. އިންޑިއާ ސިފައިން ބޭލުމުގެ މަޝްވަރާ ބައްދަލުވުމުން މިއަދު ކުރިއަށް ގެންދިއުމަށް ނިންމާފައިވާއިރު، ރައީސް މުއިއްޒު ވަނީ މާޗް 15 ގެ ކުރިން ރާއްޖޭން އިންޑިއާ ސިފައިން ބޭލުމަށް އެދިވަޑައިގެންފައެވެ.