ގައްދޫ ފުޓްސަލް ޓީމުގެ ކޯ ސްޕޮންސަރެއްގެ ގޮތުގައި ޒީރޯރާ އޮޓޯ ސަރވިސް ހަމަޖައްސައިފި

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ގޯލްޑަން ފުޓްސަލް ޗެލެންޖު 2024″ ގައި ވާދަކުރާ ގދ. ގައްދޫ ފުޓްސަލް ޓީމުގެ ކޯ ސްޕޮންސަރެއްގެ ގޮތުގައި ޒީރޯރާ އޮޓޯ ސަރވިސް ހަމަޖައްސައިފިއެވެ.

ގައްދޫ ފުޓްސަލް ޓީމުގެ ކޯ ސްޕޮންސަރ އެއްގެ ގޮތުގައި ޒީރޯރާސް އޮޓޯ ސަރވިސް އާއެކު ބޭއްވި ސޮއި ކުރުމުގެ ރަސްމިއްޔާތުގައި އެކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު - އަހުމަދު ރަޝީދު އެވެ. އަދި ގައްދޫ ފުޓްސަލް ޓީމުގެ ފަރާތުން ސޮއިކުރެއްވީ މެނޭޖަރ އަލީ މުއައްވަޒު އެވެ.

ގައްދޫ ފުޓްސަލް ޓީމުގެ ފަރާތުން ގާފު ސްޕޯޓްސް އަށް މައުލޫމާތު ދެއްވަމުން މެނޭޖަރ އަލީ މުއައްވަޒު ވިދާލުވީ ގައްދޫ ފުޓްސަލް ޓީމުގެ ކޯ ސްޕޮންސަރ އެއްގެ ގޮތުގައި ޒީރޯރާސް އޮޓޯ ސަރވިސް ހަމަޖެހިގެން ދިއުމަކީ ޓީމަށް އިތުރު ހިތްވަރެއް ލިބިގެންދިޔަ ކަމެއް ކަމަށާއި މިފުރުސަތުގައި އެކިގޮތްގޮތުން ޓީމަށް އެހިީތެރިވެދޭ ހުރިހާ ފަރާތްތަކަށް ޓީމުގެ ހުރިހާ ކުޅުންތެރިންނާއި މެނޭޖްމަންޓުގެ ފަރަާތުން ވަރަށް އިޚްލާޞްތެރިކަމާއެކީ ޝުކުރު ދަންނަވާ ކަމަށެވެ.

މިއީ މިމުބާރާތުގައި ގައްދޫ ފުޓްސަލް ޓީމު ވާދަކުރާ ފަސްވަނަ ފަހަރެވެ. އަދި މިދިޔަ އަހަރުގެ މުބާރާތުގެ އަތޮޅު ފައިނަލުގައި އެޓީމު ވާދަކޮށްފައި ވާއިރު، މިއަހަރުގެ މުބާރާތަށް ތައްޔާރުވުމުގެ ގޮތުން އެޓީމުން ވަނީ ދުރާލައި ރަނގަޅު ސްކޮޑެއް އެކުލަވާލުމަށްފަހު, މިދިޔަ ޑިސެމްބަރު މަހު މާލޭގައި ބޭއްވުނު ޓެކާސް ގްރޭޓަރ މާލޭ ކަޕްގައި ވާދަކޮށްފައެވެ.

މިއަހަރު މުބާރާތުގެ އަތޮޅު ބުރުގައި ގައްދޫގެ އިތުރުން ދެން ހިމެނެނީ ތިނަދޫ، ވާދޫ އަދި ހޯނޑެެއްދޫ އެވެ. އަދި މުބާރާތުގެ ކުޅުން ޖެނުއަރީމަހުގެ 15 ގައި ފެށުމަށް ހަމަޖެހިފައިވާ އިރު، ގދ. އަތޮޅުގެ ފުރަތަަމަ މެޗުގައި ޖެނުއަރީމަހުގެ 26 ވަނަ ދުވަހު ގައްދޫ ޓީމު ނުކުންނާނީ ހޯނޑެެއްދޫ އާއި ދެކޮޅަށެވެ. އަދި ދެވަނަ މެޗުގައި ޖެނުއަރީމަހުގެ 31 ވަނަ ދުވަހު ތިނަދޫ އާއި ދެކޮޅަށް ކުޅުމަށްފަހު، އަތޮޅު ބުރުގެ ފަހު މެޗުގައި އެންމެ ފަހުގެ ޗެމްޕިއަން ވާދޫ އާއި ދެކޮޅަށް ގައްދޫ ޓީމު ނުކުންނާނީ ފެބުރުއަރީ މަހުގެ 6 ވަނަ ދުވަހެވެ.

މިއަހަރުގެ ގޯލްޑަން ފުޓްސަލް ޗެލެންޖުގައި ވާދަކުރާ ގައްދޫ ފުޓްސަލް ޓީމުގެ މެއިން ސްޕޮންސަރ އަކީ އަލް ޝާލީ މެރިން މޯލްޑިވްސް އެވެ. އަދި ކޯ ސްޕޮންސަރުންގެ ގޮތުގައި ޒީރޯރާ އޮޓޯ ސާވިސް ގެ އިތުރުން ކައުރީ ބްރޭންޑް ހަމަޖައްސާފައި ވާއިރު، ގައްދޫ ޓީމުގެ މީޑިއާ ޕާޓްނަރަކީ ގާފު ސްޕޯޓްސް އެވެ.