އަލްޙާފިޒް ނަބީޙް ސައުދީ ރަސްގެފާނުގެ ޤުރުއާން މުބާރާތުގެ ފައިނަލަށް

ކިންގ ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާންގެ ފައިނަލަށް އަލްޙާފިޒް އަޙްމަދު ނަބީޙް ޢަބްދުލް ޤާދިރު ދަތުރުކޮށްފިއެވެ.

ކީރިތި ޤުރުއާނާބެހޭ ޤައުމީ މަރުކަޒުން މިއަދު ބުނީ 42 ވަނަ ކިންގް ޢަބްދުލް ޢަޒީޒް އިންޓަރނޭޝަނަލް މުބާތުގައި ރާއްޖޭގެ ފަރާތުން ބައިވެރިވި ދެބައިވެރިން ފުރަތަމަ ބުރުގައި ކިޔަވައިނިމިފައިވާ ކަމަށެވެ. އޭގެ އިތުރުން މުބާރާތުގެ ފައިނަލްބުރަށް އަލްޙާފިޒް އަޙްމަދު ނަބީހު ޢަބްދުލްޤާދިރު ހޮވިފައިވާކަމަށްވެސް އެ މަރުކަޒުން ވަނީ ހާމަކޮށްފައެވެ.

މި މުބާރާތުގައި ރާއްޖެ ތަމްސީލުކުރަނީ އަޙްމަދު ނަބީޙް ޢަބްދުލް ޤާދިރުގެ އިތުރުން މުޙައްމަދު ޔޫޝަޢު ބިން ޒަމްޒަމްއެވެ. މި ބައިވެރިންނާއިއެކު ބައިވެރިންގެ ބެލެނިވެރިންވެސް ސަޢުދީޢަރަބިއްޔާއަށް ވަނީ ދަތުރުކޮށްފައެވެ.

ސަޢުދީ ޢަރަބިއްޔާގެ މައްކާގައި ސެޕްޓެންބަރު މަހުގެ ދިހައަކުން އެކާވީހަށް ކުރިއަށްދާ "42 ވަނަ، ކިންގ ޢަބްދުލް ޢަޒީޒު އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާން" މުބާރާތަށް ބައިވެރިން ހޮވާފައިވަނީ ޤުރުއާނާބެހޭ ޤައުމީ މަރުކަޒުން ކުރިއަށްގެންދިޔަ އޮޑިޝަނަކުންނެވެ.

މި އޮޑިޝަން ކުރިއަށް ގެންގޮސްފައިވަނީ ބެލެނިވެރިންގެ ހާޒިރުގައި ފަނޑިޔާރުންގެ ޕެނަލަކުންނެވެ. މުބާރާތް ނިންމައި ބައިވެރިން ރާއްޖެ އައުމަށް ހަމަޖެހިފައިވަނީ 23 ސެޕްޓެންބަރު 2022 ގައެވެ.