ފާއިތުވެދިޔަ ހަފްތާތަކުގައި ޕާކިސްތާނުގައި ފެންބޮޑުވެ ބޮޑެތި ގެއްލުންތަކެއް ލިބުމާ ގުޅިގެން، ފެންބޮޑުވުމުގެ ސަބަބުން ހާލުގައި ޖެހިފައިވާ މީހުންނަށް ސްރީލަންކާ ސަރުކާރުން ސިލޯން ސައިފަތް ( ސިލޯން ޓީ ) ގެ ޝިޕްމަންޓެއް ހަދިޔާކޮށްފައެވެ.

5 ސެޕްޓެންބަރު 2022 ގައި ޕާކިސްތާނުގެ ހައިކޮމިޝަނަރ ޢުމަރު ފާރޫޤް ބުރްކީއަށް ޓީ ގެ ޝިޕްމަންޓް ހަވާލުކުރެއްވުމުގެ ރަސްމިއްޔާތުގައި ލަންކާގެ މިނިސްޓަރ އޮފް ފޮރިން އެފެއާޒް ޢަލީ ސަބްރީ ވަނީ ފެންބޮޑުވުމުގެ ސަބަބުން މަރުވި މީހުންނާއި، ޒަޚަމްވި މީހުންނާއި، ހާލުގައި ޖެހުނު މީހުންގެ ޢާއިލާތަކަށް ހަމްދަރުދީ ފާޅުކުރައްވާފައެވެ.

އަދި، ޕާކިސްތާނަށް ސްރީލަންކާ ސަރުކާރާއި ރައްޔިތުން ދެއްވާ އެއްބާރުލެއްވުމާއި އެހީތެރިކަމަށް ޕާކިސްތާނުގެ ހައި ކޮމިޝަނަރު ވަނީ ޝުކުރު އަދާކުރެއްވި އެވެ.

މި ރަސްމިއްޔާތުގައ މިނިސްޓްރީ އޮފް ފޮރިން އެފެއާޒްގެ އިސްބޭފުޅުންނާއި، ޕާކިސްތާން ހައިކޮމިޝަންގެ އިސްބޭފުޅުން ބައިވެރިވެވަޑައިގެންނެވިއެވެ.

ޕާކިސްތާނަށް މިފަހުން ކުރި އެންމެ ބޮޑު ވިއްސާރަައިގައި އެޤައުމުގެ ގިނަ ބަޔަކު ވަނީ މަރުވެސްވެފައެވެ. އަދި އެޤައުމުން ވަނީ ޤައުމުތަކުގެ އެހީއަށްވެސް އެދިފައެވެ.