ރަށްރަށުގައި ވަޒީފާގެ ފުރުސަތުތައް މަދުވާ އެއްް ސަބަބަކީ ބޭނުންވާ ހަޤީޤީ ތަރައްގީ ގެނެވިފައި ނެތުން - ރައީސް

ރަށްރަށުގައި ވަޒީފާގެ ފުރުސަތުތައް މަދުވާ އެއްް ސަބަބަކީ ބޭނުންވާ ހަޤީޤީ ތަރައްގީ ގެނެވިފައި ނެތުން ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު ވިދާޅުވެއްޖެއެވެ.

ރައީސް ސޯލިހު މިހެން ވިދާޅުވީ، މިއަހަރުގެ ޤައުމީ ޒުވާނުންގެ ދުވަސް ފާހަގަކުރުމަށް ބޭއްވި ރަސްމީ ޖަލްސާގައި ވާހަކަ ދައްކަވަމުންނެވެ. އެޖަލްސާގައި ދިވެހިރާއްޖޭގެ ގައުމީ ޔުނިވަރސިޓީގެ ފަރާތުން ހުށަހެޅުއްވި ދިރާސާގައި ރަށްރަށުގައި ވަޒީފާގެ ފުރުޞަތުތައް މަދުކަން ފާހަނގަކޮށްފައިވުމާއި ގުޅިގެން ވާހަކަ ދައްކަވަމުން ރައީސް ސޯލިހު ވިދާޅުވީ، ވަޒީފާއަށް ޒުވާނުން އަހުލުވެރިކުރުވުމަށް އޮތް އެންމެ ބޮޑު ގޮންޖެހުމަކީމުޅި ދައުލަތުގެ ނިޒާމުތައް ހަމަޖެހިފައި އޮތް ގޮތުން، ހަމައެކަނި އޮފީސް މޭޒު ދޮށުގައި ތިބެގެން އަދާކުރާ ކަހަލަ ވަޒީފާތަކަށް ޒުވާނުން ތައްޔާރުވެފައި ތިބުން ކަމަށެވެ.

"ރަށްރަށުގައި ވަޒީފާގެ ފުރުޞަތުތައް މަދުވާ އެތައް ސަބަބެއް އެބަހުރި. އެއް ސަބަބަކީ، ރަށްރަށަށް ބޭނުންވާ ޙަޤީޤީ ތަރައްޤީ ގެނެވިފައި ނެތްކަން. އެންމެ ޒަރޫރީ ޚިދުމަތްތައްވެސް ރަށްރަށުގައި ގާއިމުވެފައި ނެތުން. އަނެއް ސަބަބަކީ، އެކަހެރިކޮށް ހުރި ރަށްރަށަށް ފަސޭހައިން ދަތުރުކުރެވޭނެ އިތުބާރު ހުރި ނިޒާމެއް ގާއިމުވެފައި ނެތުން." ރައީސް ސޯލިހު ވިދާޅުވިއެވެ.

ރައީސް ސޯލިހު ވިދާޅުވީ، ވަޒީފާތައް އުފެދިގެންް އަންނަނީ ވިޔަފާރިތަކާއި ސިނާއަތްތަކުން ކަމަށާއި، އެކަމަށްޓަކައި އަސާސީ ތިން ޚިދުމަތެއް ކޮންމެހެން ބޭނުންވާ ކަމަށެވެ.

އެގޮތުން އެއް ކަމަކީ ރަށްރަށުގައި ސާފު ބޯފެނާއި ނަރުދަމާގެ ޚިދުމަތް ކަމަށެވެ. އަދި ދަތުރުފަތުރުގެ އިތުބާރު ހުރި ނިޒާމަކާއި ތިން ވަނަ ކަމެއްގެ ގޮތުގައި ގުނަންޖެހެނީ، މުވާޞަލާތީ ނިޒާމެއް ގާއިމުވެފައި އޮތުން ކަމަށެވެ. މުވާސަލާތީ ނިޒާމަކީ މިޒަމާނަށް ބަލާއިރު އެއީ އިންޓަރނެޓްގެ ޚިދުމަތް ކަމުގައި ރައީސް ސޯލިހު ފާހަގަކުރެއްވިއެވެ.