ޖަލުގައި ހުއްޓާ ނަޝީދު ނިޔާވި މައްސަލަ އެޗްއާރުސީއެމުން ބަލަން ފަށައިފި

ޝަރީއަތް ނިމެންދެން މާފުށީ ޖަލުގައި ބަންދުކޮށްފައި ހުއްޓާ މ. މުލި، ހުދުފިނިފެންމާގޭ، މުހައްމަދު ނަޝީދު ނިޔާވި މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަލަން ފަށައިފިއެވެ.

ނަޝީދު ނިޔާވުމުގައި ކަރެކްޝަންސްގެ އިހުމާލު އޮތް ކަމަށް އާއިލާއިން ތުހުމަތު ކުރެއެވެ. ނަޝީދުގެ ވަކީލު ވިދާޅުވެފައިވާ ގޮތުގައި ނަޝީދަށް އެކަށީގެންވާ ބޭސްފަރުވާ ނުލިބިގެން އެކަމުގެ ޝަކުވާ ކުރަމުން އަންނަތާ އެތައް ދުވަހެއް ވެއްޖެއެވެ. ނަމަވެސް ކަރެކްޝަނަލް ސާވިސް އިން އެކަމަށް ސަމާލުކަމެއް ދީފައި ނުވާކަމަށް ވަކީލް ވިދާޅުވިއެވެ. އުމުރުން 43 އަހަރުގެ ނަޝީދު ނިޔާވީ ނޭވާ ނުލާކަން ގޮޅީގައި ތިބި އެހެން ގައިދީންތަކެއް އެންގުމުން އިތުރު ފަރުވާ ދެމުން އަންނަނިކޮށް މިމަހުގެ 15 ވަނަ ދުވަހުއެވެ.

ނަޝީދުގެ މަރާ ގުޅިގެން މޯލްޑިވްސް ކަރެކްޝަނަލް ސާވިސްއިން ބުނެފައިވަނީ ނަޝީދު ނޭވާ ނުލާތީ އޭނާގެ ގޮޅީގައި ހުންނަ ބަންދު މީހަކު ޕްރިޒަން އޮފިސަރުންނަށް އެންގުމުން، އޭނާ މާފުށީ ޖަލުގެ މެޑިކަލް ސެންޓަރަށް ވަގުތުން ގެންގޮސް ސީޕީއާރް ދިން ކަމަށެވެ. ސީޕީއާރްއަށް ފަހުވެސް ނޭވާ ނުލުމުން، ޑޮކްޓަރު، އެދުވަހުގެ 17:26 ހާއިރު އޭނާ ނިޔާވެފައިވާ ކަމަށް ކަނޑައެޅި ކަމަށް ކަރެކްޝަނަލް ސާވިސް އިން ބުނެފައި ވެއެވެ.

ނަޝީދުގެ މަރާ ގުޅިގެން އެޗްއާރްސީއެމްގެ މީޑިއާ އޮފިސަރު އަމީރާ އަބޫބަކުރު މިއަދު ވިދާޅުވީ، ނަޝީދުގެ މަރުގެ މައްސަލަ އެ ކޮމިޝަނުން ބަލަމުން އަންނަ ކަމަށެވެ. ނަމަވެސް އެކަމުގެ އިތުރު ތަފްސީލެއް ނުދެއްވައެވެ.

ނަޝީދަކީ 2020 ވަނަ އަހަރުގެ މާޗު މަހުގެ 26 ވަނަ ދުވަހު "އިރުއަލި" ކިޔާ ދޯންޏެއްގައި ރާއްޖެއަށް 61 ކިލޯ މަސްތުވާތަކެތި އެތެރެކުރި މައްސަލައިގެ ތުހުމަތުގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ.