މިނީ ބަހަށް އުނދަގޫވާ ގޮތަށް ޕާކްކޮށްފައި ހުރުމުން 70 ވެހިކަލް ޓޯކޮށް، 797 ސްޓިކާ ޖަހައިފި

މާލޭގައި މިނީބަސް ދުއްވާ މަގުތަކުގައި ބަހަށް އުނދަގޫވާ ގޮތަށް ޕާކުކޮށްފައި ހުރުމުން މިހާތަނަށް 70 ވެހިކަލް ޓޯކޮށް، 797 ވައިލޭޝަން ސްޓިކަރ ޖަހާފައިވާ ކަމަށް ފުލުހުން ހާމަކޮށްފިއެވެ.

ފުލުހުން ހާމަކޮށްފައިވާ ގޮތުގައި، 8 ސެޕްޓެމްބަރ އިން 17 ސެޕްޓެމްބަރ އާއި ހަމައަށް މިނީ ބަސް ރޫޓްގައި ޕާކްކުރުން މަނާކުރުމާއި ގުޅިގެން އެކަން ތަންފީޒު ކުރުމަށް ފުލުހުން ކުރަމުންދާ މަސައްކަތުގެ ތެރެއިން 69 ސައިކަލާއި އެއް ކާރު ވަނީ ޓޯކޮށްފައެވެ.

އަދި ވައިލޭޝަން ސްޓިކާ 797 އުޅަނދެއްގައި ޖަހާފައިވާ ކަމަށްވެސް ފުލުހުން ހާމަކޮށްފައިވެއެވެ.

ފުލުހުން ގެންދަނީ މިނީ ބަސް ދުއްވާ ރޫޓްގައި ޓްރެފިކް ބާރު ބޮޑުވާ ސަރަހައްދުތަކުގައި ދިމާވާ ޓްރެފިކް މައްސަލަތައް ހައްލުކުރުމަށް ހަރަކާތްތެރިވަމުންނެވެ.

އަދި ބަސް ރޫޓަށް ދަތިވާގޮތަށް ޕާކުކޮށްފައި ހުންނަ އުޅަނދުތަކުގައި ވައިލޭޝަން ސްޓިކަރ ޖެހުމުގެ އިތުރުން ބަސް ދަތުރުތަކަށް ދަތިވާގޮތަށް ޕާކުކޮށްފައި ހުންނަ އުޅަނދުތައް ޓޯ ކުރަން ޖެހޭ ހާލަތުގައި ޓޯ ކުރަމުންދާނެ ކަމަށްވެސް ފުލުހުން ވިދާޅުވެފައިވެއެވެ.