އިންޑިއާގެ ހިލޭ އެހީގެ ދަށުން އަބޫބަކުރު ސްކޫލް ހިމެނޭހެން ތިން ސްކޫލެއްގައި އިންކްލޫސިވް ސަޕޯޓް ޔުނިޓް ގާއިމްކުރަނީ

އިންޑިއާގެ ހިލޭ އެހީގެ ދަށުން ގދ. ތިނަދޫ އަބޫބަކުރު ސްކޫލް ހިމެނޭހެން 3 ސްކޫލެއްގައި އިންކްލޫސިވް ސަޕޯޓް ޔުނިޓް ގާއިމްކުރަން ނިންމައިފިއެވެ.

ތިނަދޫ އަބޫބަކުރޫ ސްކޫލްގެ އިތުރިން ޔުނިޓްތައް އަޅަން ހަމަޖެހިފައި ވަނީ، ހއ. ދިއްދޫގައި ހުންނަ ހއ. އޭއީސީއާއި ލ. ގަމުގައި ހުންނަ އިހައްދޫ ސްކޫލުގައެވެ.

މިކަމަށްޓަކައި ބޭއްވި ރަސްމިއްޔާތު އޮތީ އިއްޔެ ހއ. އަތޮޅު ތައުލީމީ މަރުކަޒުގައެވެ. މި މަޝްރޫއަށް އިންޑިއާއިން 4.6 މިލިއަން ރުފިޔާގެ ހިލޭ އެހީ ދިނުމަށް ވަނީ ހަމަޖައްސައިފައެވެ.

އިންޑިއާގެ 260 މިލިއަން ރުފިޔާގެ ހިލޭ އެހީގެ ދަށުން ރާއްޖޭގައި 45 އަށްވުރެ ގިނަ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް ހިންގަމުންދާއިރު އޭގެ ތެރެއިން ގާތްގަނޑަކަށް 20 ވަރަކަށް މަޝްރޫއު ނިންމާ އިފްތިތާހު ކޮށްފައިވެއެވެ.