މޯލްޑިވިއަންގެ އޮފީހެއް ބަންގްލަދޭޝްގައި ހުޅުވައިފި

ރާއްޖޭގެ ޤައުމީ އެއާލައިން، މޯލްޑިވިއަންގެ ސޭލްސް އޮފީހެއް އަވައްޓެރި ބަންގްލަދޭޝްގައި ހުޅުވައިފި އެވެ.

މޯލްޑިވިއަންގެ އޮފީހެއް ބަންގްލަދޭޝްގައި ހުޅުވާފައިވަނީ މިދިޔަ ހޮނިހިރު ދުވަހު އެވެ. އެގޮތުން މި އޮފީސް ހުންނާނީ ބަންގްލަދޭޝްގެ ވެރިރަށް ޑާކާގައެވެ.

އޮފީސް ހުޅުވުމަށް ޑާކާގައި އޮތް ޚާއްސަ ރަސްމިއްޔާތެއްގައި އޮފީސް ހުޅުއްވައިދެއްވީ ރާއްޖެ އިން ބަންގްލަދޭޝް އަށް ކަނޑައަޅުއްވާފައި ހުންނަވާ ސަފީރު ޝިރުޒިމަތު ސަމީރު އެވެ. މިރަސްމިއްޔާތުގައި މޯލްޑިވިއަން ހިންގާ އައިލެންޑް އޭވިއޭޝަން ސާވިސްގެ މެނޭޖިން ޑިރެކްޓަރު މުހައްމަދު މިހާދު ވެސް ބައިވެރިވެވަޑައިގެންނެވި އެވެ.

މޯލްޑިވިއަނުން އަންނަނީ ބަންގްލަދޭޝްއަށް ޝެޑިއުލް ދަތުރުތަށް މިހާރުވެސް ކުރަމުންނެވެ. މިގޮތުން ކޮންމެ ހަފްތާއެއްގެ އާދީއްތަ އަންގާރަ އަދި ހުކުރު ދުވަހު މޯލްޑިވިއަންއިން ޑާކާއަށް ސީދާ ދަތުރުތަށް ކުރެއެވެ.