
viber-image-2022-02-18-11-53-17-762-876x549
ނ މަނަދޫގައި ފުލުހެއްގެ ސައިކަލުގައި ރޭ ރޯކޮއްލި މައްސަލައާއި ގުޅިގެން ބަޔަކު ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލް ވިދާޅުވީ ނ މަނަދޫގައި ފުލުހަކަށް އިންޒާރުދީ ރޯކޮއްލި މައްސަލައާއި ގުޅިގެން ކޯޓު އަމުރެއްގެ ދަށުން ތިން މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
ހައްޔަރުކުރި މީހުންގެ ވަނަވަރު ހާމަނުކުރި ނަމަވެސް ފުލުހުން ބުނީ ހައްޔަރުކޮށްފައިވަނީ އުމުރުން 22 އަހަރުގެ މީހަކާއި 27 އަހަރުގެ މީހަކާއި 31 އަހަރުގެ މީހެއް ކަމަށެވެ. ހައްޔަރުކުރި އެންމެނަކީވެސް ދިވެހި ފިރިހެނުން ކަމަށްވެސް ފުލުހުން ވަނީ ބުނެފައެވެ.
މިލަދޫ ގައި މަސްތުވާތަކެތީގެ ވިޔަފާރިކުރާ ކަމުގެ މައުލޫމާތު ލިބުމުން، އެ ސަރަހައްދަށް ގޮސް މަސްތުވާތަކެތީގެ ވިޔަފާރިކުރަން އުޅުނު މީހަކު ހުއްޓުވި ފުލުހަކަށް ވަނީ އިންޒާރުދީފައެވެ. އެއަށްފަހު، އެ ރޭ ދަންވަރުގެ ވަގުތެއްގައި ދެ މީހަކު ބައިވެރިވެގެން އެ ފުލުސް އޮފިސަރުގެ ސައިކަލުގައި ވަނީ ރޯކޮށްލާފައެވެ. އަދި ސައިކަލުގައި ރޯކޮށްލި މަންޒަރު ފެންނަ ސީސީޓީވީ ފުޓޭޖެއްވެސް ވަނީ މީސްމީޑިއާގައި އާންމުވެފައެވެ.
މަސްތުވާތަކެތީގެ ވިޔަފާރިކުރަން އުޅުނު މީހަކު ހުއްޓުވުމުން، އެ މީހާ އިންޒާރުދީފައި ވަނީ މިލަދޫ ފުލުހުންގެ ޑެސްކް އިންޗާޖް، ސާޖަންޓް މުހައްމަދު އަރީޝަށެވެ. އޭނާގެ ސައިކަލްގައި ރޭ ދަންވަރު ރޯކޮށްލި ހާދިސާއާ ގުޅިގެން ސީޕީ ހަމީދު މިއދު ކުރެއްވި ޓްވީޓެއްގައި ވަނީ އަރީޝްގެ މަސައްކަތަށް ހިއްވަރު ދެއްވައިފައެވެ.
ގޭގެ ގޯތިތެރޭގައި ޕާކްކޮށްފައި ހުރި ސައިކަލްގައި ރޯކޮށްލި މައްސަލަ ތަހުގީގުކުރަން އިސް އިންވެސްޓިގޭޓަރަކު އެ ރަށަށް ފޮނުވަން ނިންމާފއިވާކަން ފާހަގަކުރައްވައި ސީޕީ ވިދާޅުވީ، އެ ހަމަލާ ދިން މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.