
ސީޕީ ހަމީދު
ޑްރަގްގެ ވަބާ ނައްތާލުމަށް ފުލުހުން ކުރަމުންދާ މަސައްކަތުގައި ފަހަތަށް ޖެހިވަޑައި ނުގަންނަވާނެކަމަށް ކޮމިޝަނަރ އޮފް ޕޮލިސް، މުޙައްމަދު ހަމީދު ވިދާޅުވެއްޖެ އެވެ.

ސީޕީ ހަމީދު މިހެން ވިދާޅުވީ، ނ. މިލަދޫގައި ޑްރަގްގެ ވިޔަފާރިކުރަމުންދިޔަ ބަޔަކު ހުއްޓުވި ފުލުހެއްގެ ސައިކަލުގައި ރޭ ދަންވަރު ރޯކޮށްލި މައްސަލައެއްގައެވެ.
ނ. މިލަދޫގައި ޑްރަގްގެ ވިޔަފާރިކުރަން އުޅުނު ކަމަށް ތުހުމަތުކުރާ މީހަކު އެ ރަށު ޕޮލިސް ޑެސްކްގެ އިންޗާޖު، ސާޖަންޓް މުހައްމަދު އަރީޝް ހުއްޓުވުމުން، އޭނާގެ ސައިކަލްގައި ރޭ ދަންވަރު ރޯކޮށްލި ހާދިސާއާ ގުޅިގެން ސީޕީ ކުރެއްވި ޓްވީޓުގައި ވަނީ އަރީޝްގެ މަސައްކަތަށް ހިއްވަރު ދެއްވައިފައެވެ.
ގޭގެ ގޯތިތެރޭގައި ޕާކްކޮށްފައި ހުރި ސައިކަލްގައި ރޯކޮށްލި މައްސަލަ ތަހުގީގުކުރަން އިސް އިންވެސްޓިގޭޓަރަކު އެ ރަށަށް ފޮނުވަން ނިންމާފއިވާކަން ފާހަގކުރައްވައި ސީޕީ ވިދާޅުވީ، އެ ހަމަލާ ދިން މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.
ފުލުހުން ބުނީ މިލަދޫގައި މަސްތުވާތަކެތީގެ ވިޔަފާރި ކުރަން އުޅުނު މީހަކު ހުއްޓުވުމުން ފުލުހަކަށް އިންޒާރުދީ އެ ފުލުސް މީހާގެ ސައިކަލުގައި ރޭ ދަންވަރު އަލިފާން ރޯކޮށްލާފައިވާކަމަށެވެ.
މި މައްސަލައާ ގުޅިގެން އަދި މީހަކު ހައްޔަރުކޮށްފައެއް ނުވެ އެވެ.