ކޫއްޑޫ މަސް ފެކްޓަރީ މޮނިޓަރިންގެ ހާލަތުން ނަގަނީ

ގއ. ކޫއްޑޫގައި ހިންގާ ކޫއްޑޫ ފިޝަރީޒް ކޮމްޕްލެކްސްގެ އެކްޓިވް ކޭސްތައް ދަށްވުމާއި, އިތުރު ކޭސްތައް ފެނުން ހުއްޓިފައިވާތީ އެ ސަރަހައްދު މޮނިޓަރިންއިން ނެގުމުގެ މަސައްކަތް ފަށައިފިއެވެ.

ގއ. އަތޮޅު ހޮސްޕިޓަލުގެ މެނޭޖަރު, ޝަރީފް އަޙްމަދު ވިދާޅުވީ ކޫއްޑޫ މަސް ފެކްޓަރީގެ މޮނިޓަރިން އުވާލުމަށްޓަކައި ސާމްޕަލްތަކެއް ނަގަމުން އަންނަ ކަމަށެވެ. އެގޮތުން މިއަދުވެސް 16 ސާމްޕަލެއް ނަގާފައިވާ ކަމަށާއި އެ ސާމްޕަލްގެ ނަތީޖާ ލިބުމުން އެ ފެކްޓަރީގެ ކޮވިޑް ހާލަތު ދެނެގަނެވޭނެ ކަމަށެވެ. އަދި އެއަށްފަހު އެ ފެކްޓަރީ މޮނިޓަރިން އިން ނެގުމުގެ މަސައްކަތް ކުރިއަށް ގެންދަން ނިންމާފައިވާ ކަމަށްވެސް އޭނާ ވިދާޅުވިއެވެ.

ކޫއްޑޫއިން މިފަހުން ފެނުނު ކޭސްތަކުގެ ފުރަތަމަ ކޭސް ރިކޯޑް ކޮށްފައިވަނީ 11 ޖޫންގައި އެވެ. އަދި އޭގެ އަނެއް ދުވަހު އެ ފެކްޓަރީ ހިމެނޭ ސަރަހައްދު ވަނީ މޮނީޓަރިންގ ހާލަތަށް ގެނެސްފައެވެ.

ކޫއްޑޫ ފިޝަރީސް ކޮމްޕްލެކްސްގެ އެންމެ ފަހުގެ ތަފާސް ހިސާބުތައް ދައްކާ ގޮތުގައި އެތަނުން މިހާތަނަށް ޖުމްލަ 193 މީހަކު ކޮވިޑް19 އަށް ފައްސިވެފައިވެއެވެ. އޭގެ ތެރެއިން 152 މީހަކު ބަލިން ފަސޭހަވެފައިވާއިރު މިހާރު އެރަށުގެ އެކްޓިވް ކޭސްތަކުގެ އަދަދަކީ 41 އެވެ.