--
އެމެޒޯން ޕްރައިމް ވީޑިއޯއިން ގެނެސްދޭ މަގުބޫލު ރިއަލިޓީ ޝޯ "ދަ ޓްރެއިޓަރސް އިންޑިއާ" ގެ ދެވަނަ ސީޒަންގެ ރަސްމީ ޓްރެއިލަރ އާންމުކޮށްފިއެވެ.
މަޝްހޫރު ޑައިރެކްޓަރ އަދި ޕްރޮޑިއުސަރ ކަރަން ޖޯހަރް ހޯސްޓްކުރާ މި ޝޯގެ އައު ސީޒަން ޕްރިމިއަރ ކުރުމަށް ހަމަޖެހިފައިވަނީ މާދަމާއެވެ.
މިފަހަރުގެ ސީޒަންގައި ތަފާތު ދާއިރާތަކަށް ނިސްބަތްވާ 21 މަޝްހޫރު ތަރިން ބައިވެރިވެއެވެ. އޭގެ ތެރޭގައި ބޮލީވުޑްގެ ބަތަލާ މަލިކާ ޝެރާވަތު، ރިއާ ޗަކްރަބަތީ، ޓީވީ ބަތަލާ ޝްވޭތާ ތިވާރީ، ކޮމީޑިއަން މުނައްވަރު ފާރޫގީ، މަޝްހޫރު ޝެފް ރަންވީރު ބްރާރް، އަދި ޔޫޓިއުބަރ އަބީޝެކް މަލްހާން ހިމެނެއެވެ.
ޓްރެއިލަރއިން ފެނިގެންދާ ގޮތުގައި މިފަހަރުގެ ސީޒަން ފުރަތަމަ ސީޒަނަށްވުރެ މާ ފޯރިގަދަވާނެއެވެ. ޚާއްސަކޮށް ޝްވޭތާ ތިވާރީ ޓްރެއިލަރގައި "އަހަރެންގެ ފިރިމީހާ އަހަންނަށް ޗީޓް ކުރަނިކޮށް ވެސް ފަޅާއަރުވާލީ ހަމަ އަހަރެންނޭ" ބުނާ މަންޒަރަށް ގިނަ ބައެއްގެ ސަމާލުކަން ވަނީ ލިބިފައެވެ.
މީގެ އިތުރުން ރިއާ ޗަކްރަބަތީ އާއި ޕާރުލް ގުލާޓީ ފަދަ ބައިވެރިންގެ މެދުގައި ހިނގާ ބަހުގެ ހަމަލާތައްވެސް ޓްރެއިލަރއިން ފެނިގެންދެއެވެ.
މި ޝޯ ކުޅުމަށް ހަމަޖެހިފައިވަނީ ރާޖަސްތާންގެ ޖައިސަލްމޭރުގައި ހުންނަ ތާރީޚީ ސޫރްޔަގަރް ޕެލަސްގައެވެ.
ޝޯގެ މައިގަނޑު ކޮންސެޕްޓަކީ ބައިވެރިންގެ ތެރޭގައި ތިބޭ "ޓްރެއިޓަރުން" ހޯދުމަށް "އިނޮސެންޓުން" ނުވަތަ ވަފާތެރިން ކުރާ މަސައްކަތެވެ. މިފަހަރުގެ ސީޒަންގައި "ބޫ" ގެ ނަމުގައި އައު ކެރެކްޓަރެއް ތައާރަފްކޮށް، ގޭމްގެ އުސޫލުތައް އިތުރަށް އުނދަގޫކޮށްފައިވާކަން ޓްރެއިލަރއިން ހާމަވެއެވެ.
ކަރަން ޖޯހަރް ޝޯގެ ލޯންޗިން އިވެންޓުގައި ބުނެފައިވާ ގޮތުގައި، މި ސީޒަންގައި ބައިވެރިންގެ ފަރާތުން ފެނިގެންދިޔަ މަކަރާއި އޮޅުވާލުމުގެ ކުޅިގަނޑު ފެނިފައި އޭނާވެސް ވަރަށް ބޮޑަށް ހައިރާންވިއެވެ.
އޮގަސްޓު 13 އިން ފެށިގެން ކޮންމެ ބުރާސްފަތި ދުވަހަކު މި ޝޯގެ އައު އެޕިސޯޑެއް އެމެޒޯން ޕްރައިމް ވީޑިއޯ އިން ސްޓްރީމްކުރާނެއެވެ.
ފަހުގެ
