ބޭރުގެ މަސްބޯޓުތަކެއް ހުއްޓުވަން އެމްއެންޑީއެފުން ހަރަކާތްތެރިވަނީ

ގދ. އަތޮޅާއި ފުވައްމުލަކު ސިޓީއާ ދެމެދު ބޭރުގައި މަސްބޯޓުތަކެއް އުޅޭކަން ފާހަގަކުރެވިގެން އެކަން ހުއްޓުވުމުގެ މަސައްކަތް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ފަށައިފި އެވެ.

އެމްއެންޑީއެފުން ބުނީ މި މަސްބޯޓުތައް ހަރަކާތްތެރިވަމުންދަނީ ގދ. ފިޔޯރިއާ ހުޅަނގުން ގާތްގަނޑަކަށް 9 ނޯޓިކަލް މޭލު ބޭރުން ކަމަށެވެ.

ގދ. އަތޮޅާއި ފުވައްމުލަކާ ދޭތެރޭ އޮންނަ އިކްއެޓޯރިއަލް ޗެނަލް ތެރެއިން، ފިޔޯރީގެ ހުޅަނގުން ގާތްގަނޑަކަށް 9 ނޯޓިލަކް މޭލު ބޭރުން، އިރުން ހުޅަނގަށް ދަތުރުކުރަމުންދަނީ ބޭރުގެ 2 މަސްބޯޓުކަމަށް އެމްއެންޑީއެފް އަށް ރިޕޯޓްކޮށްފައިވާކަމަށް އެ އިދާރާއިން ބުންޏެވެ. މި ކަމުގެ ރިޕޯޓު ލިބުމާއެކު އެމްއެންޑީއެފް ސަދަން އޭރިއާ ކޮމާންޑުން އެ ސަރަހައްދުގައި ހަރަކާތްތެރިވާން ފަށާފައިވާކަމަށް އެމްއެންޑީއެފުން ބުންޏެވެ.

ނަމަވެސް މިކަމުގެ އިތުރު ތަފްސީލެއް އެމްއެންޑީއެފުން ހާމައެއް ނުކުރެ އެވެ.ރާއްޖޭގެ ކަނޑުގެ ސަރަހައްދަށް ހުއްދަނެތި ވަންނަ މަސްބޯޓުތައް އެމްއެންޑީއެފުން ހުއްޓުވައި ފުލުހުންނާ ހަވާލުކުރެއެވެ.