ސަރަޙައްދީ ފެންވަރުގައި ވައިގެ ފެންވަރު ރަނގަޅުކުރުމަށް ބޭއްވި މުހިންމު މަޝްވަރާގައި ރާއްޖެއިން ބައިވެރިވެއްޖެ

ދެކުނު އޭޝިއާ ސަރަޙައްދުގެ ޤައުމުތަކަށް ކުރިމަތިވެފައިވާ ވައި ނުސާފުވުމުގެ ބޮޑު މައްސަލައަށް ދާއިމީ އަދި ދެމެހެއްޓެނިވި ހައްލެއް ހޯދުމަށްޓަކައި ސަރަޙައްދީ ފެންވަރުގައި ބޭއްވި މުހިންމު މަޝްވަރާ ބައްދަލުވުމެއްގައި ދިވެހިރާއްޖެއިން އަމަލީ ގޮތުން ބައިވެރިވެއްޖެއެވެ.

"ރީޖަނަލް ޑައިލޮގް" ގެ ނަމުގައި ކުރިއަށްދިޔަ މި ބައްދަލުވުމުގައި ދިވެހިރާއްޖޭގެ ފަރާތުން ވަނީ ސަރަޙައްދީ ފެންވަރުގައި ވައި ސާފުކުރުމަށްޓަކައި ކުރެވިދާނެ މުހިންމު މަސައްކަތްތަކާއި، މިހާރު ދުނިޔޭގައި ބޭނުންކުރާ އެންމެ އެކަށީގެންވާ ރަނގަޅު އުސޫލުތަކާ ގުޅޭގޮތުން ބައިވެރިވި އެހެން ޤައުމުތަކާއެކު ފުޅާދާއިރާއެއްގައި މަޢުލޫމާތު ހިއްސާކޮށްފައެވެ.

މި ބާއްވުނު މުހިންމު ބައްދަލުވުމުގެ އެންމެ މައިގަނޑު އެއް ބޭނުމަކީ ސަރަޙައްދީ ގޮތުން އެކުލަވާލުމަށް މަސައްކަތްކުރާ"ސައުތު އޭޝިއާ ކްލީން އެއާ އެކްޝަން ޕްލޭން" ގެ ފަރުމާއާ ގުޅޭގޮތުން ފުންކޮށް މަޝްވަރާކޮށް، އެ ޕްލޭން އިތުރަށް ފުރިހަމަކޮށް ވަރުގަދަކުރުމެވެ. މިއީ ކުރިއަށް އޮތް ތަނުގައި ސަރަޙައްދީ ފެންވަރުގައި ވައިގެ ތަޣައްޔަރުކަން ކުޑަކުރުމަށްޓަކައި އެންމެހައި ޤައުމުތަކުން އަމަލުކުރާނެ ގޮތުގެ މުހިންމު މަގުޗާޓެއްގެ ގޮތުގައި ފާހަގަކުރެވޭ ބޮޑު މަޝްރޫޢެކެވެ.

މި މަޝްވަރާތަކުގައި ބައިވެރިވި ދެކުނު އޭޝިއާގެ އެކި ޤައުމުތަކުން ވަނީ، އެއް ޤައުމުން އަނެއް ޤައުމަށް ވަޔާއެކު ދަތުރުކުރާ ވައި ނުސާފުވުމުގެ މައްސަލަ ނުވަތަ "ޓްރާންސްބައުންޑްރީ އެއާ ޕޮލިއުޝަން" އަކީ މިހާރު މުޅި ސަރަޙައްދަށްވެސް ކުރިމަތިވެފައިވާ އެންމެ ނުރައްކާތެރި އަދި ބޮޑު ގޮންޖެހުންކަން ފާހަގަކޮށްފައެވެ. އަދި މިފަދަ ބޮޑު ތިމާވެށީގެ މައްސަލައަކަށް ހަމައެކަނި ޤައުމަކުން ވަކިން ކުރާ މަސައްކަތުން ހައްލެއް ނުހޯދޭނެ ކަމަށާއި، މިކަމަށް ދާއިމީ ހައްލެއް ހޯދޭނީ ސަރަޙައްދީ ގުޅުން މިހާރަށްވުރެ ބަދަހިކޮށް، އެންމެން ގުޅިގެން އެއް އަމާޒަކަށް މަސައްކަތް ކޮށްގެންކަން މި ބައްދަލުވުމުގައި ހުރިހާ ޤައުމުތަކުން އަނެއްކާވެސް ވަނީ ކަށަވަރުކޮށްދީފައެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ތިމާވެށި ހިމާޔަތްކުރުމަށާއި، ރައްޔިތުންގެ ސިއްހަތަށް ފައިދާހުރި ގޮތަކަށް ވައިގެ ފެންވަރު ރަނގަޅުކުރުމަށް ބައިނަލްއަޤުވާމީ އަދި ސަރަޙައްދީ މައިދާނުގައި ކުރަމުންދާ މުހިންމު މަސައްކަތްތަކުގެ ތެރެއިން މިފަދަ މަތީ ފެންވަރުގެ ބައްދަލުވުންތަކުގައި ރާއްޖެއިން އިސްނަގައިގެން ބައިވެރިވުމަކީ ލިބިގެންދާ ބޮޑު ކުރިއެރުމެކެވެ. މި ބައްދަލުވުމުގެ ސަބަބުން ކުރިއަށް އޮތް ތަނުގައި ރާއްޖޭގެ ވައިގެ ފެންވަރު މޮނިޓަރ ކުރުމުގެ ނިޒާމުތައް އިތުރަށް ހަރުދަނާވެ، ބައިނަލްއަޤުވާމީ އެހީތެރިކަން ލިބުމަށް މަގުފަހިވެގެންދާނެއެވެ.