އޯތޮޑޮންޓިކް ފުރަތަމަ ސިމްޕޯޒިއަމް "ބިޔަންޑް ސްޓްރެއިޓް ޓީތު" ކާމިޔާބުކަމާއެކު ބާއްވައިފި

ދުނިޔޭގެ އޯތޮޑޮންޓިކް ސިއްހަތުގެ ދުވަސް ފާހަގަކުރުމުގެ ގޮތުން، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ޑިޕާޓްމަންޓް އޮފް ޑެންޓިސްޓްރީ އެންޑް އޮރޯފޭޝަލް ސާޖަރީން އިންތިޒާމުކޮށްގެން "ބިޔަންޑް ސްޓްރެއިޓް ޓީތު" ގެ ނަމުގައި ފުރަތަމަ އޯތޮޑޮންޓިކް ސިމްޕޯޒިއަމް ބާއްވައިފިއެވެ.

2026 ވަނަ އަހަރުގެ ދުނިޔޭގެ އޯތޮޑޮންޓިކް ސިއްހަތުގެ ދުވަހާ ދިމާކޮށް ބޭއްވި މި ސިމްޕޯޒިއަމްގައި ރާއްޖޭގެ އެކި ކަންކޮޅުތަކުން ގިނަ އަދަދެއްގެ ދަތުގެ ސިއްހީ މާހިރުން ބައިވެރިވެފައިވެއެވެ.

އައިޖީއެމް ހޮސްޕިޓަލުން ބުނީ މި ބައްދަލުވުމުގެ މައިގަނޑު މަގްސަދަކީ ސައިންޓިފިކް ހެކިތަކުގެ މައްޗަށް ބިނާކޮށް، ދަތްތައް ސީދާކުރުމާއި މޫނުމަތީގެ އެކި ބައިތަކުގެ ފަރުވާ އެކި ދާއިރާތަކުން ގުޅިގެން ކުރިއަށްގެންދިއުމާ ބެހޭގޮތުން ފުޅާ ދާއިރާއެއްގައި މަޝްވަރާކުރުން ކަމަށެވެ.

މި ސިމްޕޯޒިއަމްގައި އެންމެ ބޮޑު އިސްކަމެއް ދީފައިވަނީ އެކި ދާއިރާތަކުގެ ޑޮކްޓަރުން ގުޅިގެން، ބަލިމީހާއަށް އެންމެ ފައިދާހުރި ގޮތަށް ފަރުވާ ދިނުމުގެ މުހިންމުކަމުގެ މައްޗަށެވެ. މީގެ އިތުރުން، މިފަދަ ގުޅިފައިވާ ފަރުވާގެ ސަބަބުން ދަތްތަކާއި އަނގަޔާ ގުޅުންހުރި މަސައްކަތްތައް ފުރިހަމަވެ، މޫނުމަތީގެ ރީތިކަމާއި އެއްވަރުވުން އިތުރުވެ، ބަލިމީހާއަށް ލިބޭ ނަތީޖާ ވަރަށް ބޮޑަށް ރަނގަޅުވެގެންދާނެކަން މި ސިމްޕޯޒިއަމްގައި ފާހަގަކޮށްފައިވެއެވެ.

އައިޖީއެމްއެޗް އިން އިސްނަގައިގެން ބޭއްވި މި ހަރަކާތަކީ ރާއްޖޭގެ ދަތުގެ ސިއްހީ ދާއިރާ އިތުރު ހަރުފަތަކަށް ކުރިއަށްގެންދިއުމަށް އެޅުނު މުހިންމު ފިޔަވަޅެކެވެ.