ކައުންސިލްތަކަށް އަލަށް އިންތިހާބުވި ގިނަ މެމްބަރުން ހުވާކޮށްފި

ލޯކަލް ކައުންސިލްތަކަށް އަލަށް އިންތިހާބުވި މެމްބަރުން ހުވައިކުރުމާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީއަށް އިންތިހާބުވި މެމްބަރުން އިގްރާރުގައި ސޮއިކުރުމުގެ ރަސްމިއްޔާތުތައް ބާއްވަން ފަށައިފި އެވެ.

ތިނަދޫ ސިޓީ ފިޔަވައި ހުރިހާސިޓީއެއްގެ ރަސްމިއްޔާތުތައް ބާއްވާފައިވާއިރު، އެހެން ރަށްތަށުގެ ރަސްމިއްޔާތުތައްވެސް މިއަދުގެ އެކިގަޑިތަކުގައި ކުރިއަށްދާނެ އެވެ. ތިނަދޫ ސިޓީގެ ހުވައިކުރުމުގެ ރަސްމިއްޔާތު ބާއްވަން ނިންމާފައިވަނީ މިރޭ 8:15 ގައެވެ.

ކައުންސިލްތަކުގެ 5 ވަނަ ދައުރަށް އިންތިޚާބު ކުރެވުނު މެންބަރުން ހުވާކުރުމުގެ ރަސްމިއްޔާތުތަކުގައި ހުވާލައިދެއްވީ އެރަށަކަށް އެކަމަށް ކަނޑައެޅިފައި ހުންނަވާ ފަނޑިޔާރު ނުވަތަ ޤާޟީއެކެވެ.

އަލަށް އިންތިހާބުވި ހުރިހާ މެންބަރުން ހުވާކުރައްވައި އިޤުރާރުގައި ސޮއިކުރައްވައި ނިމުމާއެކު، ކައުންސިލްތަކުގެ ފުރަތަމަ ރަސްމީ ބައްދަލުވުން ބާއްވާނެއެވެ. މި ބައްދަލުވުންތަކުގައި ޑެޕިއުޓީ މޭޔަރުންނާއި، ކައުންސިލްތަކުގެ ނައިބު ރައީސުން ހޮވުމުގެ މަސައްކަތް ކުރިއަށް ދާނެއެވެ. މިއީ އައު ދައުރުގެ މަސައްކަތްތައް ރަސްމީކޮށް ފެށުމަށްޓަކައި ކުރެވޭ އެންމެ މުހިންމު އެއް މަސައްކަތެވެ.

މީގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންވެސް އިޤުރާރުގައި ސޮއިކުރެއްވުމަށްފަހު، އެކޮމެޓީތަކުގެ ނައިބުރައީސުން ހޮވުމުގެ މަސައްކަތް ކުރިއަށް ގެންދާނެ އެވެ.