އިޓަލީގެ ޑައިވަރުންތައް ހޯދަން ސިފައިން ކުރިޔަށްގެންދާ ޚާއްސަ އޮޕަރޭޝަން ހިނގަމުންދާ ގޮތް ބައްލަވާލެއްވުމަށް ރައީސް އެސަރަހައްދަށް!

ޑައިވިންގ އަށް ގޮސް އުޅެނިކޮށް އިއްޔެ ގެއްލުނު އިޓަލީގެ ޑައިވަރުންތައް ހޯދަން ސިފައިން ކުރިޔަށްގެންދާ ޚާއްސަ އޮޕަރޭޝަން ހިނގަމުންދާ ގޮތް ބައްލަވާލެއްވުމަށް ރައީސް ޑރ މުހައްމަދު މުއިއްޒު އެސަރަހައްދަށް ވަޑައިގަންނަވައިފި އެވެ.

ރައީސް ޑރ މުހައްމަދު މުއިއްޒު މި ހާދިސާ ހިނގި ކަމަށް ބެލެވޭ ސަރަހައްދަށް ވަޑައިގެންނެވީ މިއަދު ހަވީރު އެވެ.

އެގޮތުން އެމަނިކުފާނު އެސަރަހައްދަށް ވަޑައިގެންނެވެމުން މި ޚާއްސަ ރެސްކިއު އޮަޕަރޭޝަން ކުރިޔަށްގެންދާ ރާއްޖޭގެ ދިފާއީ ބާރުން ވަނީ މި އޮޕަރޭޝަންގެ އެންމެ ފަހުގެ އަދާހަމަ ރައީސް ޑރ މުހައްމަދު މުއިއްޒު އާއި ހިއްސާކުރައްވާފައި އެވެ. އަދި ސިފައިންގެ ޑައިވަރުން މި އޮޕަރޭޝަންގައި ހަރަކާތްތެރިވާ މަންޒަރުވެސް އެމަނިކުފާނު ވަނީ ބައްލަވާލައްވާފައި އެވެ.

ރައީސްގެ އަރިހުގައި އެސަރަހައްދަށް ފޮރިން މިނިސްޓަރ އިރުދިޝާމް އާދަމްއާއި ޓުއަރިޒަމް މިނިސްޓަރު މުހައްމަދު އަމީންގެ އިތުރުން ހޯމްލޭންޑް މިނިސްޓަރު އަލީ އިހުސާނުއާއި ސަލާމަތީ ބާރުގެ އިސް އޮފިޝަލުންވެސް ވަޑައިގެންނެވި އެވެ.

އެސަރަހައްދަށް ވަޑައިގެން ރައީސް އެކްސްގައި ހިއްސާކުރެއްވި ތަޢުޒިޔާގެ މެސެޖުގައި ވަނީ، މި ހާދިސާއާ ގުޅިގެން ފުން ހިތާމައެއް ލިބިވަޑައިގެންފައިވާކަމަށާ، ނިޔާވި މީހާއާއި ގެއްލިގެން ހޯދަމުންދާ މީހުންގެ ޢާއިލާތަކާއި ހެޔޮ އެދޭ ފަރާތްތަކަށް، ހެޔޮ ދުޢާކުރައްވާކަމަށް ވިދާޅުވެފައިވެއެވެ.

އަދި ގެއްލިފައިވާ ހަތަރު މީހުން ހޯދުމުގެ މަސައްކަތް ޚާއްޞަ އިސްކަމެއް ދެއްވައިގެން ކުރައްވަމުން ގެންދަވާކަމުގެ ޔަޤީންކަންވެސް އެމަނިކުފާނު ދެއްވިއެވެ. އަދި މިކަމަށްޓަކައި ކުރިއަށްގެންދާ ރިކަވަރީ އޮޕަރޭޝަންގައި އިޓަލީވިލާތުގެ ސަރުކާރުން ދެއްވަމުން ގެންދަވާ އެހީތެރިކަމަށްވެސް އެމަނިކުފާނު ވަނީ ޝުކުރުއަދާކުރައްވާފައެވެ.

މި ހާދިސާއާއި ގުޅިގެން އެމްއެންޑީއެފުން އިއްޔެ ބުނީ ބުނީ ޑައިވަރުން ގެއްލިގެން އުޅޭކަމުގެ ރިޕޯޓް، އެމްއެންޑީއެފް ކޯސްޓްގާޑު، މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ)އަށް އިއްޔެގެ 13:45 ހާއިރު ލިބުމާ އެކު، މި މީހުން ހޯދުމުގެ މަސައްކަތް، ކަނޑާއި ވައިގެ މަގުން އެމްއެންޑީއެފުން ދިޔައީ ކުރަމުން ކަމަށެވެ. މި މަސައްކަތުގައި ސަފާރީއާއި، ވ.އަތޮޅު ޕޮލިސް ސްޓޭޝަނުގެ އިތުރުން އަލިމަތާ ރިސޯޓުގެ އެހީތެރިކަންދަނީ ލިބެމުން ކަމަށެވެ.

އެގޮތުން ގެއްލުނު ކަމުގެ ރިޕޯޓު ލިބުނު 5 ޑައިވަރުންގެ ތެރެއިން އެކެއްގެ ހަށިގަނޑު ފެނިފައިވަނީ، އެމީހުން ހޯދުމުގެ މަސައްކަތުގައި ހަރަކާތްތެރިވި ސަފާރީގެ ޑައިވަރުންނަށް، އިއްޔެގެ 18:13 ހާއިރު މޫދު އަޑިން ކަމަށާއި އެމީހާގެ ހަށިގަނޑު މިހާރުވަނީ ވ.ފުލިދޫ ހެލްތު ސެންޓަރަށް ގެންގޮސްފައި ކަމަށް ސިފައިން ވަނީ ބުނެފައި އެވެ.

ސިފައިން އިތުރަށް ބުނީ އޭނާގެ ހަށިގަނޑު ފެނިފައިވަނީ ގާތްގަނޑަކަށް 60 މީޓަރުގެ އަޑިން ކޭވްއެއްގެ ތެރެއިން ކަމަށާއި ބާކީ ތިބި ހަތަރު ޑައިވަރުން ވީކަމަށް ލަފާކުރެވެނީ، ދިގުމިނުގައި ގާތްގަނޑަކަށް 200 ފޫޓު ހުންނަ މި ކޭވްގެ ތެރޭގައި ކަމަށެވެ.

މިއީ ވަރަށް ނުރައްކާތެރި ހައި ރިސްކް އޮޕަރޭޝަނަކަށް ވަތީ، އެމްއެންޑީއެފް ކޯސްޓްގާޑުގެ އިތުރު ޑައިވަރުންނާއި ބޭނުންވާ ޚާއްޞަ ސާމާނު މިހާރު އެސަރަހައްދަށް ފޮނުވާފައިވާ ކަންވެސް ވަނީ ސިފައިން ހާމަކޮށްފައެވެ.

އަދި މި އޮޕަރޭޝަން ނިމެންދެން އެމްއެންޑީއެފް ކޯސްޓްގާޑް ޝިޕް ޣާޒީ އެ ސަރަޙައްދުގައި ހަރަކާތްތެރިވާނެކަންވެސް ހާމަކޮށްފައިވެއެވެ.