ޑިޖިޓަލް ސަމިޓުން ހާމަވީ ޓެކްނޮލޮޖީގެ ނިޒާމު ބަދަލުކުރަން ބޭނުންވާ މިންވަރު: ޑރ. ކިނާނަތު

މޯލްޑިވްސް ޑިޖިޓަލް ސަމިޓް 2026އިން ހާމަކޮށްދިނީ ޓެކްނޮލޮޖީ އާއި ގުޅިގެން މަސައްކަތްކުރުމުގެ ތެރެއިން އާންމު ޚިދުމަތްތައް ފޯރުކޮށްދިނުމުގެ ނިޒާމު ބަދަލުކުރުމަށް ސަރުކާރުން ދެމިތިބި ކަމުގެ ފުރިހަމަ ޔަގީންކަން ކަމަށް މިނިސްޓަރ އޮފް ސްޓޭޓް ފޯރ ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ އަދި މޯލްޑިވްސް ޑިޖިޓަލް ސަރވިސްގެ އިސްވެރިޔާ ޑރ. މުޙައްމަދު ކިނާނަތު ވިދާޅުވެއްޖެއެވެ.

"މޯލްޑިވްސް ޑިޖިޓަލް ސަމިޓް 2026" ނިންމުމުގެ ރަސްމިއްޔާތުގައި ވާހަކަ ދައްކަވަމުން ސްޓޭޓް މިނިސްޓަރ ޑރ. ކިނާނަތު ވިދާޅުވީ މޯލްޑިވްސް ޑިޖިޓަލް ސަމިޓް 2026 އިން ހާމަކޮށްދެނީ ޓެކްނޮލޮޖީ އާއި، އީޖާދީ އުފެއްދުންތެރިކަމާއި، އަދި ގުޅިގެން މަސައްކަތްކުރުމުގެ ތެރެއިން އާންމު ޚިދުމަތްތައް ފޯރުކޮށްދިނުމުގެ ނިޒާމު ބަދަލުކުރުމަށް ސަރުކާރުން ދެމިތިބި ކަމުގެ ފުރިހަމަ ހެއްކެއް ކަމަށެވެ.

ދުނިޔޭގެ ފެންވަރުގެ ތަޖުރިބާއާއި ޤައުމީ ލީޑަރޝިޕް ގުޅުވާލައިގެން، ސަމިޓުން ވަނީ ޓެކްނޮލޮޖީގެ ތަޞައްވުރު ޢަމަލީ ސިފައަކަށް ބަދަލުކޮށްފައިކަން ފާހަގަކުރައްވާ ޑރ. ކިނާނަތު ވިދާޅުވީ މިއީ ދިވެހިރާއްޖެއަށް ވިލުންތެރި، ޑޭޓާއަށް ބިނާކޮށްފައިވާ، އަދި ރައްޔިތުންނަށް އިސްކަންދޭ ޑިޖިޓަލް މުސްތަޤުބަލެއްގެ ބިންގާ އެޅުން ކަމަށެވެ.

މި ސަމިޓަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް 2.0"ގެ ތަޞައްވުރު ކުރިއެރުވުމަށްޓަކައި ބައިނަލްއަޤްވާމީ ތަޖުރިބާ އާއި، ރަނގަޅު އުސޫލުތަކާއި، ޢަމަލީ ފިލާވަޅުތައް ޙިއްޞާކުރުމަށް ބޭއްވި ސަމިޓެއްކަން ސްޓޭޓް ވަނީ ފާހަގަކުރައްވާފައެވެ.

ޑރ. ކިނާނަތު ވިދާޅުވީ ސަމިޓް ފަރުމާކުރީ މުއައްސަސާތަކުގެ މެދުގައިވާ ގުޅުން ހަރުދަނާކުރުމަށާއި، އާންމު ޚިދުމަތްތައް ޒަމާނީކުރުމަށާއި، އަދި ޑޭޓާއަށް ބިނާކޮށް ވެރިކަން ހިންގުމަށް މަގުފަހިކުރުމަށް މަތީ ފެންވަރުގެ މަޝްވަރާތަކާއި ޢަމަލީ ބައިވެރިވުން އިތުރުކުރުމަށް ކަމަށެވެ.

މޯލްޑިވްސް 2.0ގެ ތަޞައްވުރުގައި ކަނޑައަޅާފައިވަނީ ރައްޔިތުންނަށް އަވަސް އަދި ހާމަކަން ބޮޑު ޚިދުމަތްތަކެއް ފޯރުކޮށްދިނުމަށް ކަމަށާއި މިއީ ހަމަގައިމުވެސް ޤައުމުގެ މިސްރާބު އަލުން ކަނޑައަޅައިދޭނެ މުހިންމު އިސްނެގުމެއްކަން ސްޓޭޓްގެ ވާހަކައިގައި ފާހަގަކުރެއްވިއެވެ.

އަދި މީގެ ސަބަބުން 2040 ވަނަ އަހަރު އަންނަންވާއިރަށް ތަރައްޤީވެފައިވާ ޤައުމެއްގެ ދަރަޖަ ހާސިލުކުރުމަށް ސަރުކާރުން ގެންގުޅޭ ފުޅާ ތަޞައްވުރަށްވެސް އެހީތެރިވެދޭނެ ކަމަށް ޑރ. ކިނާނަތު ވިދާޅުވިއެވެ.

"މޯލްޑިވްސް ޑިޖިޓަލް ސަމިޓް 2026"ގައި ބައިވެރިވި މުހިންމު މުއައްސަސާތަކަކުގެ ތެރޭގައި ރައީސުލްޖުމްހޫރިއްޔާގެ އޮފީސް، ކަމާގުޅޭ ވުޒާރާތައް، މޯލްޑިވްސް ޑިޖިޓަލް ސަރވިސް (އެމް.ޑީ.އެސް)، މައިންޑްކޯ (MINDCo)، އެން.ސީ.އެސް.އޭ (NCSA)، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީ.އެން.އާރު)، އަދި ވޯލްޑް ބޭންކްގެ މަންދޫބުން ހިމެނެއެވެ.

ސަމިޓްގެ މަޝްވަރާތަކާއި ސެޝަންތައް މައިގަނޑު ގޮތެއްގައި އަމާޒުކުރީ ރާއްޖޭގެ ޑިޖިޓަލް ޓްރާންސްފޯމޭޝަން ދަތުރުގެ މުހިންމު ތަނބުތަކުގެ މައްޗަށް:

• ޑިޖިޓަލް ޓްރާންސްފޯމޭޝަނަށް ބޭނުންވާ ވެރިކަން ހިންގުމުގެ ނިޒާމާއި މުއައްސަސާތަކުގެ ގުޅުން

• ނޭޝަނަލް ޑޭޓާ އެކްސްޗޭންޖް ޕްލެޓްފޯމެއް މެދުވެރިކޮށް ރައްކާތެރި އަދި ގުޅިފައިވާ ޑޭޓާ ޙިއްޞާކުރުން

• ޚިދުމަތްތައް ހޯދުމަށް ފަސޭހަކޮށްދިނުމަށާއި ހަލުވިކުރުމަށްޓަކައި ރައްޔިތުންނަށް އަމާޒުކޮށްގެން ޚިދުމަތްތައް ފަރުމާކުރުން

• ޑިޖިޓަލް އައިޑެންޓިޓީ ނިޒާމުތައް

• ޒިންމާދާރުކަމާއެކު އާޓިފިޝަލް އިންޓެލިޖެންސް (އޭއައި) އަދި ކުރިއަރަމުން އަންނަ ޓެކްނޮލޮޖީތައް ބޭނުންކުރުން

• މޯލްޑިވްސް 2.0 ތަންފީޒުކުރުމަށް ސާފު އަދި ޢަމަލީ ރޯޑްމެޕެއް އެކުލަވާލުން

މި ސަމިޓަކީ މޯލްޑިވްސް ޑިޖިޓަލް ސަރވިސް (އެމް.ޑީ.އެސް) އާއި ވޯލްޑްބޭންކް ގުޅިގެން ބޭއްވި ސަމިޓެކެވެ.