ކައުންސިލްތަކުގެ އެއްބާރުލުން ނުލިބޭނަމަ އެކަން ރައްޔިތުންނަށް ހާމަކުރާނަން - ރައީސް

ރައްޔިތުންނަށްވީ ވައުދުތައް ފުއްދުމުގައި ކައުންސިލުތަކުން ސަރުކާރަށް ހުރަސް އަޅާނަމަ އެކަން ހާމަ ކުރައްވާނެ ކަމަށް، ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، ނިމިދިޔަ ކައުންސިލު އިންތިޚާބުގައި އއ. ރަސްދުއާއި ތޮއްޑުއާއި އުކުޅަހުން ޕީއެންސީއަށް ލިބުނު ކާމިޔާބީ ފާހަގަކުރުމަށް އއ. ރަސްދޫގައި ރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސް ވިދާޅުވީ، ކޮންމެ ޕާޓީއަކުން މަޤާމަކަށް އިންތިޚާބުވި ނަމަވެސް އިސްކުރައްވާނީ ދީނާއި، ޤައުމުގެ މަސްލަހަތުކަމަށެވެ. އަދި ކައުންސިލްތަކާ ގުޅިގެން ވައުދުތައް ފުއްދުމަށް ހަމަހަމަކަމާއެކު ސަރުކާރުން މަސައްކަތްކުރައްވާނެ ކަމުގެ ޔަގީންކަން ރައީސް ދެއްވެވި އެވެ.

ނަމަވެސް ސަރުކާރުން ވީ ވައުދުތައް ފުއްދުމަށް ކައުންސިލުތަކުން ހުރަސް އަޅާނަމަ ރައްޔިތުންނަށް އެކަން ތަފުސީލުކޮށް ހާމަކޮށްދެއްވާނެ ކަމަށް ރައީސް ވިދާޅުވިއެވެ.

މާލެ ސިޓީ ކައުންސިލަށް އަލަށް ހޮވުނު މެމްބަރުންނަށް އިޝާރަތް ކުރައްވައި ރައީސް ވިދާޅުވީ، މާލޭ މަގުމަތިން ފެންނަނީ އިންތިހާބީ މެމްބަރުން ހަމަނުޖެހުން ހިންގާ މަންޒަރުތައް ކަމަށެވެ. އަދި ރައްޔިތުން ވޯޓު ދިނީ ހަމަނުޖެހުން ހިންގަން ނޫން ކަމަށާއި، ވޯޓުދިނީ ރައްޔިތުންގެ ފަރާތުން ގޮސް މަގާމާ ހަވާލުވާ ދުވަހުން ފެށިގެން ޒިންމާދާރު މަސައްކަތެއް ކުރުމަށް ކަމަށްވެސް ރައީސް ވިދާޅުވި އެވެ.

ނިމިދިޔަ ރައްޔިތުންގެ ޚިޔާލު ހޯދުމުގެ ވޯޓުގައި ލިބުނު ނާކާމިޔާބީއަށް އަލިއަޅުއްވަލައްވަމުން ރައީސް ވިދާޅުވީ އެވޯޓު ނާކާމިޔާބުވުމުގެ ތަފާތު ސަބަބުތައްވާކަމަށާއި، އެކަމުގައި ޕީއެންސީގެ ކެމްޕެއިން ޓީމުތަކުން އެކަށީގެންވާ މަސައްކަތެއް ނުކުރެވުންވެސް ހިމެނޭކަމަށެވެ. ރައީސް ވިދާޅުވީ، ސާފުކޮށް އޮތް މައްސަލައެއް ރައްޔިތުންނަށް އެކަށީގެންވާ ގޮތެއްގައި ޕީއެންސީ މެމްބަރުންނަށް ކިޔައިދެވިފައި ނުވާކަމަށެވެ. ރައީސް ވިދާޅުވީ އެ ވޯޓުގައި ރައްޔިތުން ނިންމެވި ނިންމެވުމަށް މިއަދުވެސް ފުރިހަމައަށް އިޙްތިރާމް ކުރައްވާކަމަށެވެ.