ރައީސްގެ ނޫސްވެރިންގެ ބައްދަލުވުންތައް ކުރިއެކޭ އެއްގޮތަށް ކޮންމެ ހަފްތާއަކު ކުރިއަށް ގެންދާނެ - ސްޕޯކްސް ޕާސަން

ރައީސުލްޖުމްހޫރިއްޔާ ޑރ، މުހައްމަދު މުއިއްޒު، ކަނޑައެޅިފައިވާ އުސޫލާ އެއްގޮތަށް ކޮންމެ ހަފްތާއަކު ހޯމަ ދުވަހު ނޫސްވެރިންނާ ބައްދަލުކުރައްވާނެ ކަމަށް ރައީސް އޮފީހުގެ ސްޕޯކްސް ޕާސަން ހީނާ ވަލީދު ވިދާޅުވެއްޖެ އެވެ.

ލޯކަލް ކައުންސިލް އިންތިހާބަށްފަހު ރައީސް ނޫސްވެރިންނާ ބައްދަލުކުރެއްވުން މެދުކަނޑާލައިފައިވާކަމަށް ދެކެވޭ ވާހަކަތަކާއި ގުޅިގެން ހީނާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ނޫސްވެރިންނާ ބައްދަލުކުރެއްވުން 1 މާރިޗް 2026 ން ފެށިގެން ކަނޑައަޅުއްވާފައިވާ އުޞޫލުގެ މަތިން ގަވާއިދުން ކުރިޔަށްދާނެ ކަމަށެވެ.

ހީނާ ވަނީ ރައީސް މުއިއްޒު މިއަހަރު އިއްވެވި ރިޔާސީ ބަޔާނުގައި، ނޫސްވެރިންނާ ބައްދަލުކުރެއްވުމާ ގުޅޭގޮތުން ދެއްކެވި ވާހަކަފުޅު ހިއްސާކުރައްވާފައެވެ.

ރިޔާސީ ބަޔާނުގައި ރައީސް ވިދާޅުވީ، މާރޗް މަހުން ފެށިގެން އާއްމު އުސޫލެއްގެ މަތިން ކޮންމެ ހަފްތާއެއްގެ ހޯމަ ދުވަހު ހެނދުނު 10:00 އިން 11:00 އަށް ނޫސްވެރިންނާ ބައްދަލުކުރައްވާނެ ކަމަށެވެ.

އެހެންކަމުން ކުރިއަށް އޮތް ހަފްތާގެ ހޯމަ ދުވަހު ނޫސްވެރިންގެ ބައްދަލުވުން އޮންނާނެ ކަމަށް ހީނާ ވިދާޅުވި އެވެ. ނަމަވެސް މިހަފްތާގެ ބައްދަލުވުން ނުބާއްވަން މެދުވެރިވި ސަބަބެއް ސީދާ ހާމަކޮށްފައެއް ނުވެއެވެ.