ޓްރަމްޕުގެ ފާޑުކިޔުން އިނގިރޭސިވިލާތަށް: " އަހަރަމެން މޮޅުވެފައި އޮތް ހަނގުރާމައަކަށް ދެން އެހީތެރިވާނެ ކަމެއް ނެތް، މިކަން ހަނދާން ހުންނާނެ"

މެދުއިރުމަތީގައި މިހާރު ހިނގަމުންދާ ހަނގުރާމާގައި އެމެރިކާއަށް ކާމިޔާބު ލިބިފައިވާ ކަމަށާއި ކާމިޔާބު ލިބިފައި އޮތް ހަނގުރާމައަކަށް ދެން އެހީތެރިވުމުގެ މާނައެއް ނެތް ކަމަށްބުނެ އެމެރިކާގެ ރައީސް ޑޮނަލްޑް ޓްރަމްޕު އިނގިރޭސިވިލާތަށް ފާޑުކިޔައިފި އެވެ.

ޑޮނަލްޑް ޓްރަމްޕް އޭނާގެ ޓްރޫތް ސޯޝަލް އެކައުންޓުގައި އިނގިރޭސިވިލާތުގެ ބޮޑުވަޒީރު ސަރ ކޭއާ ސްޓާމަރ އަށް ނިސްބަތްކޮށް ލިޔުއްވި ޕޯސްޓެއްގައި ބުނީ އިނގިރޭސިވިލާތުން މެދުއިރުމައްޗަށް ދެ މަތިންދާބޯޓު އުފުލާ ބޯޓު ފޮނުވުމަށް "އެންމެ ފަހުން ސީރިއަސްކޮށް ވިސްނަމުންދާ" ނަމަވެސް އެއީ މިހާރު ބޭކާރު ކަމެއް ކަމަށެވެ.

" އަހަރަމެން ކާމިޔާބު ހޯދާފައިވާ ހަނގުރާމަތަކަށް ފަހުން އެހީވާން އަންނަ ބަޔަކު އަހަރަމެން ބޭނުމެއް ނުވޭ" ޓްރަމްޕުގެ ޕޯސްޓުގައި ބުންޏެވެ.

އަދި މިކަން އެމެރިކާގެ ހަނދާނުގައި ހުންނާނެ ކަމަށްވެސް ޓްރަމްޕު ވަނީ ބުނެފައި އެވެ.

ޓްރަމްޕު މިފަދައިން ބުނި އިރު އިނގިރޭސިވިލާތުގެ ދެ މަނަވަރު މެދުއިރުމައްޗަށް ޑިޕްލޮއި ކުރުމަށް މިހާރު އަންނަނީ ތައްޔާރުވަމުންނެވެ،. އެގޮތުން އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ތެރެއަށް މަނަވަރުތައް ފޮނުވަން ޖެހިދާނެ ކަމުގެ އެލާޓް ވެސް އެ ދެ މަނަވަރުގެ ކްރޫންނަށް މިހާރު ދީފައިވާ ކަމަށް މަސްދަރަކުން ބުނެ އެވެ.