ޕީއެންސީގެ ކޮންގްރެސް އޮކްޓޯބަރު މަހު ބާއްވަނީ: ރައީސް އަމާޒަކީ ކޮންގްރެސްގެ ކުރީން ޕާޓީއަށް އެއްލައްކަ މެމްބަރުން ހަމަކުރުން!

ސަރުކާރު ހިންގާ ޕީއެންސީގެ ކޮންގްރެސް އަންނަ އޮކްޓޫބަރު މަހުގެ ތެރޭގައި އޮންނާނެ ކަމަށާ އުންމީދަކީ ޕާޓީގެ މެންބަރުންގެ އަދަދު 100,000 އިތުރުކުރުން ކަމުގައި ކޮންގްރެސް ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

ރައީސް މިކަން ހާމަކުރެއްވީ ޕީއެންސީން މރޭ އާޓިފިޝަލް ބީޗުގައި ބޭއްވި" ދަ ގްރޭޓާރ އައްޑޫ ވިޝަން" އިފްތިތާހުކުރުމަށް ބޭއްވި ޚާއްސަ ޖަލްސާގައި ވާހަކަފުޅުދައްކަވަމުންނެވެ.

އެގޮތުން ރައީސް ވިދާޅުވީ، ޕީއެންސީން މަސައްކަތްކުރާނީ ރައްޔިތުންގެ މަސްލަޙަތު އިސްކޮށް، އެއް ޓީމެއްގެ ގޮތުގައިކަމަށާއި އެޕާޓީއަކީ ޕާޓީ ނިޒާމަށް ފުރިހަމައަށް ތަބާވާ، އެ ނިޒާމު ކުރިއެރުވުމަށާއި ޑިމޮކްރަސީއަށް ލޯބިކުރާ ޕާޓީއެއްކަމަށެވެ. ޕީއެންސީގެ ކޮންގްރެސް އަންނަ އޮކްޓޫބަރުމަހުގެ ތެރޭގައި ބާއްވާގޮތަށް ޕާޓީގެ ލީޑަރޝިޕުން މިހާރު ނިންމާފައިވާކަން ފާހަގަކުރައްވަމުން ރައީސް ވިދާޅުވީ މިއީ ޕާޓީގެ ތެރެއިން ސިޔާސީގޮތުން ކުރިއަށްދިއުމަށްޓަކާ ބޭނުންވާ ފަރާތްތަކަށް ލިބޭ ވަރަށް މުހިއްމު ފުރުޞަތެއްކަމަށެވެ.

އަދި އެކި ސަބަބުތަކާއި ހުރެ ދުރުގައި ތިއްބެވި ޕާޓީގެ މެންބަރުން ވެސް އައު ހިތްވަރަކާއެކު މަސައްކަތް ފެށުމަށް އެދިވަޑައިގަތެވެ. ރައީސް ވިދާޅުވީ ކޮންގްރެސްގައި މަޤާމުތަކަށް މެންބަރުން އިންތިހާބު ކުރުމަށް ބޭއްވޭނީ ވަރަށް ދެފުށްފެންނަ އިންތިޚާބުތަކެއް ކަމަށެވެ.

"މި ކޮންގްރެސްއަކީ ވަރަށް އިންސާފުވެރިކަމާއެކީ އަޅުގަނޑުމެން ބާއްވާނެ ވަރަށް ދެފުށްފެންނަ ވަރަށް ފުރިހަމަ ކޮންގްރެސްއަކަށް އިރާދަކުރެއްވިއްޔާވާނެ. މި ޕާޓީން ކަންކަން ކުރާނީ އަބަދުވެސް އަޅުގަނޑުމެން ކުރާގޮތަށް ވަރަށް އޯގަނައިޒްޑްކޮށް، ވަރަށް ތަރުތީބުން ދެފުށްފެންނަ ގޮތަށް." ރައީސް ޑރ. މުޢިއްޒު ވިދާޅުވިއެވެ.ރައީސް ވިދާޅުވީ، ޕީއެންސީގެ މަސައްކަތްތައް 2023 ވަނަ އަހަރުގެ ނޮވެމްބަރުގައި 3000 މެންބަރުންނާއެކު ފެށުނު ނަމަވެސް، މިހާރު އެ އަދަދު 75،000 އަރާފައިވާކަމަށެވެ. އަދި އެ ޕާޓީގެ އަމާޒުހުރީ މެންބަރުންގެ އަދަދު އެއްލައްކައަށްވުރެ އިތުރުކުރުންކަމަށް އެމަނިކުފާނު ވިދާޅުވިއެވެ.