"ރާއްޖޭގެ ކަނޑުން ބައެއް ދޫކޮށްލުމަކީ އެންމެ މަތީ ދަރަޖާގައި ޤައުމަށް ޣައްދާރުވުން"

ކަނޑުން ބައެއް ގެއްލުނީ ނިމިދިޔަ އެމްޑީޕީ ސަރުކާރުން ގަސްތުގައި ކުރި ކަންތައްތަކެއްގެ ސަބަބުން ކަމަށާ އެއީ ޤައުމަށް އެންމެ މަތީ ދަރަޖާގައި ޣައްދާރުވުން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިފަކުރައްވައިފި އެވެ.

ރޭ ޕީއެންސީގެ ފަރާތުން ބޭއްވި ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވަނީ ކަނޑުން ގެއްލުނު ބައި ހޯދުމަށް ކުރަމުންދާ މަސައްކަތާއި އެ މަސައްކަތް އޮތް ގޮންޖެހުންތަކާއި ގުޅޭ މައުލޫމާތު ހިއްސާ ކުރައްވާފަ އެވެ. އެގޮތުން މިދިޔަ ސަރުކާރު ހިންގީ ޤައުމީ އެއްވެސް ވިސްނުމެއް ނެތް ބައެއް ކަަމަށާއި އެކަން ކަނޑުގެ މައްސަލާގަައި އަމަލުކުރި ގޮތުން އެކަނިވެސް ސާފުވާ ކަމުގައި ރައީސް ވިދާޅުވިއެވެ.

ފޯޅަވަހީގެ މައްސަލަ މޮރިޝަސް ސަރުކާރުން އާބިޓްރޭޝަނަށް ހުށައެޅި ކަމަށާއި އެ މައްސަލަ ކޮންމެ ގޮތަކަށް ނިމުނުނަމަވެސް އެ ނިންމުމަކަށް ޗެލެންޖު ކުރަން ސަރުކާރަށް ފަސޭހަވާނެ ކަން ފާހަގަކުރައްވައި ރައީސް ވިދާޅުވީ އެކަން އެގޮތަށް ވުމަށް ފުރުސަތު ނުދީ މިދިޔަ ސަރުކާރުން އިސްވެ ކަނޑުގެ މައްސަލަ އިޓްލޮސްއަށް މައްސަލަ ހުށައެޅީ ކަމަށާއި އެ މައްސަލަ ނިމިގެން އައީ ރާއްޖޭގެ ކަނޑުގެ ސަރަޙައްދުން ބޮޑުބައެއް ގެއްލޭ ގޮތަށް ކަމަށެވެ.

ޤައުމަށް އެންމެ ފައިދާ ގޮތް އޮއްވާ 37 މިލިއަން ރުފިޔާ ޚަރަދުކޮށް އަދި ކަނޑުން ބޮޑު ބައެއް ދޫކޮށްލަން ޖެހޭ ގޮތަށް ނިންމުން އައީ ސަރުކާރުން އަމަލުކުރި ގޮތުން ކަން ފާހަގަކުރައްވަމުން ރައީސް ވަނީ މިއީ ކަނޑައެޅިގެން ޤާނޫނު އަސާސީއާ ޚިލާފު އަދި އެންމެ މަތީ ދަރަޖައިގެ ޚިޔާނާތުގެ ކުށެއް ނުވަތަ ޤައުމަށް ޣައްދާރުވުމުގެ ކުށެއްކުށަކަށްވާނެކަމުގައި ވިދާޅުވެފައި އެވެ.

ރައީސް ވިދާޅުވީ ކަނޑުން ގެއްލުނު ބައި ހޯދުމުގެ މަސައްކަތަށް ސަރުކާރަށް ލަފާ ދޭ ބައިނަލްއަޤްވާމީ މާޙިރުން ވެސް މިދިޔަ ސަރުކާރުން ޤައުމަށް ގެއްލުންވާނެ މިފަދަ ރޫޓެއް ޚިޔާރުކުރި ކުރުމާއިމެދު ސުވާލު އުފެއްދި ކަމަށެވެ. އަދި އެކަން ކުރީ ވެސް މަޖިލީހުން ހުއްދަ ނުހޯދާ ސިއްރުސިއްރުން ސިޓީއެއް ފޮނުވައިގެން ކަމަށަށް ރައީސް ވިދާޅުވި އެވެ.

" އެންމެ މަތީ ޚިޔާނާތުގެ ކުށެއް ނުވަތަ ޤައުމަށް ޣައްދާރުވުމުގެ ކުށެއް މިކުރީ ޚަރަދުވެސް ކޮށްގެން. މިވަރުކަމެއް ކޮށްފައި ތިބި ބަޔަކު ނިކުމެ ރައްޔިތުންގެ ގާތުގައި މި އެދެނީ ވޯޓަށް," ރައީސް ވިދާޅުވި އެވެ.

ރައީސް އިތުރަށް ވިދާޅުވީ މޮރިޝަސްއަށް ކުރީގެ ރައީސް ސޯލިހް, ފޮނުއްވެވި ސިޓީ އަނބުރާ ގެންނަވަން ނިންމެވީ އެއީ މިވަރުގެ ޚިޔާނާތަކަށްވާތީ ކަމަަށެާއި އެހެން ކަމުން ރިޔާސީ ބަޔާން އިއްވެވި ދުވަހުގެ މެންދުރު ފަހު އެ ސިޓީ އަނބުރާ ގެންނަވާކަން މޮރިޝަސް ސަރުކާރަށް ރަސްމީކޮށް އަންގާފައިވާ ކަމަށެވެ. މި މަސައްކަތްތަކުގެ ތެރެއިން ސަރުކާރުން މިހާރު މަސައްކަތް ކުރައްވަނީ ކަމާބެހޭ ބައިނަލްއަޤްވާމީ އިދާރާތަކަށް ހުށައަޅައިގެން ކަނޑުން ގެއްލުނު ބައި ހޯދުމަށް ކަމަށާއި އެކަން ކާމިޔާބުކުރައްވާނެ ކަމުގެ ޔަގީންކަންވެސް ރައީސް މިރޭ ވަނީ ދެއްވާފައި އެވެ.