ދާރުލްއާސާރަށް ބަދަލު ގެނައުމުގެ މަސައްކަތް މިއަހަރު ފަށަނީ!

ގައުމީ ދާރުލްއާސާރަށް ބަދަލު ގެނައުމުގެ މަސައްކަތްތަކެއް މި އހަަރުތެރޭގައި ފެށުމަށް ހަމަޖެހިފައިވާކަމަށް ދިވެހިބަހާއި ސަގާފަތާއި ތަރިކައާބެހޭ މިނިސްޓަރު އާދަމް ނަޞީރު އިބްރާހީމް ވިދާޅުވެއްޖެ އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ މިނިސްޓްރީގެ ފަރާތުން ކުރިއަށްގެންދިއުމަށް ނިންމާފައިވާ ބައެއް މަޝްރޫއުތަކުގެ މައުލޫމާތު ހިއްސާކުރަމުން މިނިސްޓަރު ވިދާޅުވީ މާލޭގައި ހުންނަ ދާރުލްއާސާރަކީ ކުރީ ޒަމާނަށް ވަރަށް ރަނގަޅު ދާރުލްއާސާރެއް ނަމަވެސް ދުނިޔޭގެ ދާރުލްއާސާރުތައްހެން ޒަމާނީ ޓެކްނޮލޮޖީއާއެކު ގައުމީ ދާރުލްއާސާރު ތަރައްގީ ކުރަން ޖެހޭ ކަމަށެވެ.

މިނިސްޓަރު ވިދާޅުވީ ޗައިނާގެ އެހީގައި ހަދާފައިވާ ދާރުލްއާސާރު އިތުރަށް މަރާމާތު ކުރުމުގެ މަސައްކަތް ސަރުކާރުގެ ފަރާތުން ޗައިނާއާ ވާހަކަދައްކައިގެން، މި އަހަރުގެ ތެރޭގައި ބަދަލުތައް ގެނެސް، އިތުރަށް ތަރައްޤީކުރުމުގެ މަސައްކަތް ކުރިއަށްގެންދިއުމަށް ހަމަޖެހިފައިވާ ކަމަށެވެ.

"އޭގެއިތުރަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ޚާއްސަ އިރުޝާދުގެ ދަށުން މިއަހަރުތެރޭގަ ދާރުލްއާސާރު މި ދެންނެވި، މިހާރު މިހިރަ ދާރުލްއާސާރުގެ އެތެރެއަށް ބަދަލުތައް ގެނައުމުގެ މަސައްކަތްތަކެއް މިއަހަރުތެރޭގަ އަޅުގަނޑުމެން ކުރާނަން. އެކަން ޕްލޭންކުރެވިފަ ރޭވިފަ އެބައޮތް" މިނިސްޓަރު ވިދާޅުވި އެވެ.

މާލޭގައި ތަރައްގީކުރާ އިންޓަރެކްޓިވް މިއުޒިއަމްގެ މަސައްކަތް ފާހަގަކުރައްވާ މިނިސްޓަރު ވިދާޅުވީ އެ މަސައްކަތް ނިމިގެންދިއުމާއެކު، މިހާރު ހުރި ދާރުލްއާސާރުގެ އެތެރެއާއި، ފަންނީ ދާރުލްއާސާރާއެކު ތަފާތު އިންގިލާބީ ބަދަަލެއް ފެނިގެންދާނެ ކަމަށެވެ.

"އިންޓަރެކްޓިވް މިއުޒިއަމްގެ މަސައްކަތް ނިމިގެން އަންނައިރު ދާރުލްއާސާރުގެ އެތެރެއާއި މި ދަންނަވާ ފަންނީ ދާރުލްއާސާރާ މި ދެބައި ގުޅިގެން މުޅިން ތަފާތު އިންޤިލާބީ ބަދަލެއް އަނެއްކާވެސް ދާރުލްއާސާރުގެ ތެރެއިންވެސް ފެނިގެންދާނެ" މިނިސްޓަރު ވިދާޅުވި އެވެ.