ހަމްދާންގެ އިންޒާރު: ފްލެޓުތައް ކުއްޔަށް ދޭނަމަ 50،000 ރުފިޔާއިން ޖޫރިމަނާކޮށް ފްލެޓް އަތުލާނަން!

ފަހި ދިރިއުޅުން ކޯޕަރޭޝަން (އެފްޑީސީ) ފްލެޓްތައް ކުއްޔަށް ދޭނަމަ ފްލެޓްގެ ވެރިމީހާ 50،000 ރުފިޔާއިން ޖޫރިމަނާކޮށް، ފްލެޓް އަތުލާނެ ކަމަށް އެ ކޯޕަރޭޝަނުން ބުނެފި އެވެ.

ބައެއް ފްލެޓްތައް ކުއްޔަށްދޭ މައްސަލަ މީސްމީޑިއާގައި ބޮޑުވެފައިވަނިކޮށް އެފްޑީސީގެ މެނޭޖިންގް ޑިރެކްޓަރު ހަމްދާން ޝަކީލް ވަނީ މި މައްސަލަ އެކުންފުނީގެ ސަމާލުކަމަށް އައިސްފައިވާ ކަމަށާއި އަދި އެ މައްސަލަ ބެލުމުގެ މަސައްކަތް ފަށާފައިވާ ކަމަށް ވިދާޅުވެފަ އެވެ.

ހަމްދާން އެކްސްގައި ހިއްސާކުރި ޕޯސްޓުގައި ވަނީ އެފްޑީސީ ފްލެޓްތަކަކީ 3 ވަނަ ފަރާތަކަށް ކުއްޔަން ދެވޭނެ ތަންތަން ނޫންކަން ތަކުރާރުކުރައްވާފަ އެވެ. އަދި މިފަދަ އަމަލުތައް ކުރާ ފަރާތްތައް 50،000 ރުފިޔާއާ ހަމައަށް ޖޫރިމަނާކޮށް ފްލެޓުގެ އެއްބަސްވުން އުވާލެވޭނެ ކަމަށް އޭނާ ވިދާޅުވި އެވެ.

މީގެއިތުރުން ހަމްދާން ވިދާޅުވީ ސަރުކާރުން އިޖްތިމާއީ ބޯހިޔާވަހިކަމަށް ދޫކޮށްފައިވާ ފްލެޓްތައް ކުއްޔަށް ދިނުމަކީ އިޖްތިމާއީ ބޯހިޔާވަހިކަމުގެ މަޝްރޫއުތަކުގެ މަގްސަދަށް ހުރަސް އެޅޭ ކަމެއް ކަމަށެވެ. އަދި އަސާސެއް ގޮތުން މިއީ ގޯސް އަމަލެއްކަން ފާހަގަކޮށް އޭނާ ވަނީ ފްލެޓްތަކުން ފައިދާ ހޯދާ ވިޔަފާރިއަކަށް ހެދުމަކީ ކޮންމެ ދިވެއްސެއްގެ ހައްގަށްވެސް އަރައިގަތުން ކަމަށް ވިދާޅުވެފަ އެވެ.

ބޯހިޔާވަހިކަމުގެ މަޝްރޫއުގެ ދަށުން ހުޅުމާލޭގައި ތަރައްގީކޮށްފައިވާ 4000 ހައުސިން ޔުނިޓުތައް ހަވާލުކުރަމުންދަނީ ފިނިޝިން ހުރިހާ މަސައްކަތެއްވެސް ނިންމުމަށްފަހު އެވެ. ފްލެޓްގެ އެއްބަސްވުމުގައި ސޮއިކުރުމަށް، ލިސްޓް ކަނޑައެޅުމުގެ މަސައްކަތް ކުރަނީ ގެދޮރުވެރިކަމާ ބެހޭ ވުޒާރާއިންނެވެ. އެފްޑީސީން ސޮއިކުރަމުންދަނީ އެވުޒާރާއިން ފޮނުވާ ލިސްޓަށެވެ.

ފްލެޓްތައް ކުއްޔަށް ދޫކުރާ މައްސަލަތައް މިހާރުދަނީ ވަރަށް ބޮޑުވަމުންނެވެ. އެގޮތުން ފްލެޓް ވެރިފަރާތް ސަރުކާރުން 11،500 ރުފިޔާ އަށް ދޫކޮށްފައިވާ 3 ކޮޓަރީގެ އެޕާޓްމެންޓެއް 23،000 ރުފިޔާ އަށް ދޫކުރުމަށް ޕޯސްޓު ޖަހާފައި ހުރެ އެވެ.