ގާފު ރެސިޕީ: ޗޮކްލެޓް ލަޒާނިއާ

ގާފު ރެސިޕީ އަކީ ކޮންމެ އަހަރެއްގެ ރަމަޟާން މަހާއި ދިމާކޮށް ގާފު ނޫހުގެ ކިޔުންތެރިންނާއި ހަމައަށް މި ނޫހުގެ ފަރާތުން ގެނެސްދޭ ރެސިޕީއަށް ޚާއްސަ ސެގްމެންޓެކެވެ.

އެގޮތުން މި ސެގްމެންޓު 2023 ވަނަ އަހަރުން ފެށިގެން ކޮންމެ އަހަރެއްގެ ރަމަޟާން މަހުވެސް ގާފު ނޫހުން ގެނެސްދެއެވެ.

1447 ވަނަ އަހަރުގެ ރަމަޟާން މަހުގެ ކޮންމެ ދުވަހެއްގައިވެސް ތަފާތު ރެސިޕީތަކެއް ކިޔުންތެރިންނާއި ހަމައަށް ގެނެސްދެވޭނެ އެވެ. އެގޮތުން މިއަހަރުގެ ރަމަޟާން މަހުގެ ސަތާރަވަނަ ރެސިޕީއެއްގެ ގޮތުގައި މިގެނެސްމިދެނީ ޗޮކްލެޓް ލަޒާނިއާ އެވެ.

ބޭނުންވާނެ ތަކެތި:

1. 36 އޯރިއޯ ބިސްކޯދު
2. 6 މޭޒުމަތީ ސަމުސާ ބަޓަރު (ދިޔާކޮށްފައި)
3. 200 ގްރާމް ޗީޒް
4. 1/4 ޖޯޑު ހަކުރު
5. 2 މޭޒުމަތީ ސަމުސާ ރޯ ކިރު (ފިނިކުރި)
6. ވިޕްޑް ކްރީމް
7. 2 ޕެކެޓް ޗޮކްލެޓް އިންސްޓަންޓް ޕުޑިން
8. 3 1/4 ޖޯޑު ރޯ ކިރު (ފިނިކޮށްފައި)
9. 1 1/2 ޖޯޑު ޗޮކްލެޓް ޗިޕްސް

ތައްޔާރުކުރާނެ ގޮތް:

ފުރަތަމަ އޯރިއޯތައް ފުނޑު ކޮށްލާށެވެ. އަދި ފުނޑުކުރި އޯރިއޯތައް ބޯތަށްޓަކަށް އެޅުމަށްފަހު ބަޓަރު އެޅުމަށްފަހު އުލެއް ބޭނުންކޮށްގެން ރަނގަޅަށް އެއްކޮށްލާށެވެ. ހުރިހާ އޯރިއޯއެއްގައި ރަނގަޅަށް ބަޓަރު އުނގުޅުމުން ފިހާ ޓްރޭ އެއްގައި އަތުރާށެވެ. އެއަށްފަހު ފްރިޖަށް ލާފައި ބަހައްޓާށެވެ. ދެން ޗީޒް ރަނގަޅަށް މިކްސް ކޮށްލާށެވެ. އެއަށްފަހު އޭގެ ތެރެއަށް ދެ މޭޒުމަތީ ސަމުސާ ކިރާއި ހަކުރު އެޅުމަށްފަހު ރަނގަޅަށް އެއްކޮށްލާށެވެ.

ހުރިހާ އެއްޗެއް ރަނގަޅަށް މިކްސް ވުމުން އޭގެ ތެރެއަށް 1 1/4 ޖޯޑު ވިޕް ކްރީމް އަޅާއި އެއްކުރުމަށްފަހު އޯރިއޯތައް މަތީގައި މި ކްރީމް ގަނޑު އުނގުޅާލާށެވެ.

ބޯތަށްޓެއްގައި ޗޮކްލެޓް ޕުޑިން އާއި 3 1/4 ޖޯޑު ރޯ ކިރު އަޅައި ރަނގަޅަށް އެއްކޮށްލާށެވެ. ޕުޑިން އެއްކޮށް އޮލަވުމުން ދޭފަތެއް ބޭނުންކޮށްގެން އޯރިއޯ އަދި ޗީޒް ކްރީމްގެ މަތީގައި އުނގުޅާށެވެ. ދެން 5 މިނެޓް ބަހައްޓާލަށެވެ. އޭގެ މަތީގައި ވިޕްޑް ކްރީމް އުނގުޅާލުމަށްފަހު ޗޮކްލެޓް ޗިޕްސް ތައް މައްޗަށް އެޅުމަށްފަހު 4 ވަރަކަށް ގަޑިއިރު ވަންދެން ފްރިޖުގައި ބަހައްޓާށެވެ.