ސްޓެލްކޯގެ ކަސްޓަމަރ ސަރވިސް ޕޯޓަލް 'ވަށަނި" އިފްތިތާހްކޮށްފި

ޒަމާނީ ފަސޭހަތަކާއެކު، ސްޓެލްކޯގެ ކަރަންޓާއި ގުޅުންހުރި ހުރިހާ ހިދުމަތަކަށް އެދެވޭ ގޮތަށް ފަރުމާކޮށްފައިވާ ވަށަނި ޕޯޓަލް އިފްތިތާހުކޮށްފި އެވެ.

އިއްޔެ ބޭއްވުނު ރަސްމިއްޔާތެއްގައި މި ޕޯޓަލް އިފްތިތާހުކޮށްދެއްވީ ސްޓެލްކޯ ހިންގެވުމާއި ހަވާލުވެވަޑައިގެން ހުންނެވި، ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒުވަރުއެވެ.

ސްޓެލްކޯއިން ބުނީ ޚިދުމަތްތައް ވަށާޖެހި، ފަސޭހަކަމާއެކު އެއްތަނަކުން ލިބެންހުންނަ މި ޕޯޓަލްގައި އީފާސް މެދުވެރިކޮށް ފަސޭހަކަމާއެކު ރަޖިސްޓްރީ ކޮށްލެވޭނެ ކަމަށާއި އަދި ޔޫ.އާރް.އޭ ގެ އިލެކްޓްރިކަލް އިންޖިނިއަރިންގ ލައިސަންސް އޮންނަ ފަރާތްތަކަށް، އެ ފަރާތެއްގެ ނަމުގައި ހުށަހެޅޭ ޚިދުމަތްތަކުގެ ފޯމުތައް ބަލައިގަނެ، އެޕްރޫވް ކުރުމުގެ ފުރުޞަތު ވެސް ލިބިގެންދާނެ ކަމަށެވެ.

މީގެ އިތުރުން، ރާއްޖެއާއި ރާއްޖެއިން ބޭރުންވެސް، ޕޯޓަލް މެދުވެރިކޮށް ކަރަންޓުގެ ޚިދުމަތްތަކަށް އެދުމާއި ފައިސާ ދެއްކުމުގެ އިންތިޒާމު މި ޕޯޓަލްގައި ހަމަޖައްސާފައިވާއިރު ހުށަހަޅާފައިވާ އެޕްލިކޭޝަންތަކުގެ މައުލޫމާތާއި، ކުރިން ހޯދާފައިވާ ހިދުމަތްތަކުގެ ތަފްސީލުގެ އިތުރުން، ހިދުމަތްތަކުގެ މަރުހަލާތައް ކުރިއަށްދާގޮތުގެ އަދާހަމަ މައުލޫމާތު އެސްއެމްއެސް މެދުވެރިކޮށް ފޯނަށް ލިބެމުންދާނެކަމަށް ސްޓެލްކޯއިން ބުނެއެވެ.

ވަށަނި ޕޯޓަލް އިފްތިތާހު ކުރުމަށް ބޭއްވި ހަފްލާގައި ވާހަކަ ދައްކަވަމުން ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒުވަރު ވިދާޅުވީ މި ހިދުމަތް ތައާރަފްވެގެންދިޔުމަކީ އެކުންފުންޏަށް ވަރަށްބެސް އުފާވެރި މުނާސަބާއެއް ކަމަށާއި މިއީ ކުންފުނީގެ މަސައްކަތްތަކުގެ ތެރެއިން އާންމު ރައްޔިތުންނާއި ގުޅުންހުރި ވަރަށް މުހިއްމު މަސައްކަތެއް ނިމި އިފްތިތާހު ކުރެވޭ ދުވަސް ކަމަށެވެ. އަދި މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނަވާ މޯލްޑިވްސް 2.0 އަދި ރާއްޖޭގެ ޑިޖިޓަލައިޒޭޝަން ޕްރޮގްރާމާއި، ކުންފުނީގެ ހިދުމަތްތަކާއި ގުޅޭގޮތުން ގެނެވޭ ވަރަށް މުހިއްމު ހަރަކާތެއް ކަމުގައި ވެސް އަޒުވަރު ވިދާޅުވިއެވެ.

"ވަށާ ޖެހޭ ހިދުމަތެއް. އަޅުގަނޑުމެންގެ ހިދުމަތް އޮންލައިން ކުރެވި ޕޭޕަރލެސް ސިސްޓަމަކަށް މިވެގެން މިދިޔައީ. މިއީ އަޅުގަނޑުމެން ދުވަސްތަކެއް ވަންދެން ކުރަމުން އައި އުއްމީދެއްގެ ނިމުން. އެހެން ވީމަ މިއަދަކީ ވަރަށް ފާހަގަކޮށްލެވޭ ކުންފުނީގެ ހަޔާތުގައި މުހިއްމު ދުވަހެއް ކަމަށް އަޅުގަނޑު ދެކެނީ.. " ޑރ. އަލީ އަޒުވަރު

މީގެ އިތުރުން އަޒުވަރު ވިދާޅުވީ، މި ހިދުމަތަކީ އާންމުން ބަލައިގަންނާނެ. އަދި ކުންފުނީގެ ފަރާތުން ފޯރުކޮށްމިދޭ ހިދުމަތްތައް މިހާރަށްވުރެ ބޮޑަށް ލުއިފަސޭހަކަމާއެކު، ލިބިގެންދާނެ ހިދުމަތެއް ކަމަށެވެ. އަދި މި އިންޑަސްޓްރީގައި އޮންލައިންކޮށް މި ހިދުމަތް ދިނުމުގައި އެހެން ހަރުފަތަކަށް ގެންގޮސްދޭ މަސައްކަތަކަށް މިކަން ވާނެ ކަމަށާއި އަދި ސްޓެލްކޯގެ ހިދުމަތްތަކަކީ 24 ގަޑި އިރު ދޭ ހިދުމަތަކަށް ވުމުން އެ ފަސޭހަ ކަސްޓަމަރުންނަށް ލިބިގެންދާނެ ކަމަށެވެ.