އިންޑިއާ ކަނޑުގައި އެމެރިކާ ސަބްމެރިންއަކުން އިރާނުގެ މަނަވަރަށް ދިން ހަމަލާ: ދެވަނަ ބޮޑު ހަނގުރާމައަށްފަހު ފެނުނު އެންމެ ރަހުމުކުޑަ ހަމަލާ!

އިރާނުގެ މަނަވަރަށް ދިން ހަމަލާއަކީ ދެވަނަ ބޮޑު ހަނގުރާމައަށްފަހު މިހާތަނަށް ކަނޑުމަތީގައި ދިން އެންމެ ގެއްލުންބޮޑު އަދި ރަހުމު ކުޑަ އަސްކަރީ ހަމަލާގެ ގޮތުގައި ރިޕޯޓުތައް ބުނަން ފަށައިފި އެވެ.

ލަންކާއާއި މާދުރުނޫން ސަރަހައްދެއްގައި އިންޑިއާ ކަނޑުގައި އޮތް އީރާނުގެ ހަނގުރާމަ މަތީ މަނަވަރު އައިރިސް ޑެނާއަށް އިއްޔެގެ ވަގުތެއްގައި ހަމަލާދިނީ އެމެރިކާގެ ސަބްމެރިންއަކުން ކަން ވަނީ ހާމަވެފައި އެވެ. މިކަން ހާމަވެފައިވަނީ މި ހަމަލާއާއި ގުޅިގެން އެމެރިމާ އަސްކަރިއްޔާއިން މިއަދު އާންމުކުރި ވީޑިއޯއަކުންނެވެ. އެގޮތުން އެމެރިކާގެ އަސްކަރިއްޔާއިން ވަނީ އެބޯޓަށް އެގައުމުގެ ސަބްމެރިންއަކުން ޓޯޕީޑޯއަކުން ހަމަލާދޭ މަންޒަރާއި ހަމަލާއަށްފަހު ބޯޓަށް ބޮޑެތި ގެއްލުންތަކެއް ލިބިގެންދާ މަންޒަރު ފެންނަ ވީޑިއޯ އެއް އާންމުކޮށްފައެވެ.

މި ވީޑިއޯ އާންމުކުރުމާއި ގުޅިގެން ހަނގުރާމައިގެ ހަބަރުތައް ގެނެސްދެމުންދާ ބައިނަލަގްވާމީ ނޫސްވެރިން ވަނީ މިއީ ދެވަނަ ބޮޑު ހަނގުރާމައަށްފަހު މިހާތަނަށް ކަނޑުގައި ދިން އެންމެ ބޮޑު އަސްކަރީ ހަމަލާކަމުގައި ސިފަކޮށްފައެވެ.

އެމެރިކާގެ އަސްކަރީ ސަބްމެރިންއަކުން ދިން ހަމަލާއަކާ ގުޅިގެން ލަންކާގެ ދެކުނު އައްސޭރީގައި އަޑިއަށް ދިޔަ އީރާނުގެ މި މަނަވަރުން މިހާތަނަށް 80 ވަރަކަށް ހަށިގަނޑު ފެނިފައިވާ ކަމަށް ލަންކާގެ ފޮރިން މިނިސްޓަރުގެ ނައިބު އަރޫން ހެމަޗަންދްރާ ވަނީ ވިދާޅުވެފައި އެވެ.

އެ ހާދިސާއާ ގުޅޭ ގޮތުން ވާހަކަ ދައްކަވަމުން ޑެޕިއުޓީ މިނިސްޓަރު ވިދާޅުވީ މި ހަމަލާއާއި ގުޅިގެން ލަންކާގެ ކަނޑުގެ ސަރަހައްދުގައި ސާޗް އެންޑް ރިކަވަރީ އޮޕަރޭޝަންތައް ކުރިއަށްދާ ކަމަށެވެ. މިހާދިސާ ހިނގި އިރު އެ މަނަވަރުގައި 180 އެއްހާ ފަޅުވެރިން ތިއްބެވެ. ކަމާބެހޭ ފަރާތްތަކުން ބުނާ ގޮތުގައި 100 އަށް ވުރެ ގިނަ އިރާނު ސިފައިން މަރުވެދާނެ ކަމުގެ ބިރު އޮތްއިރު، އިތުރު ބައެއް ސިފައިން އަދިވެސް ހޯދުމުގެ މަސައްކަތްދަނީ ކުރަމުންނެވެ.

ލަންކާ ކަނޑުގެ ސިފައިން ސަލާމަތްކުރި އީރާނުގެ 32 ސިފައިން ލަންކާއަށް ގެނެސް، ފަރުވާއަށް ކަރަޕިޓިޔާ ޓީޗިން ހޮސްޕިޓަލުގައި ވަނީ އެޑްމިޓްކޮށްފައެވެ.