ލަންކާ ކައިރިން އިރާނުގެ ބޯޓަށް ހަމަލާދިނީ އެމެރިކާގެ ސަބްމެރިންއަކުން: ވީޑިއޯ އާންމުކޮށްފި

ލަންކާ ކައިރިން އިރާނުގެ ބޯޓަށް ހަމަލާދިނީ އެމެރިކާގެ ސަބްމެރިންއަކުންކަން ހާމަވެއްޖެ އެވެ.

މިކަން ހާމަވެފައިވަނީ މި ހަމަލާއާއި ގުޅިގެން އެމެރިމާ އަސްކަރިއްޔާއިން މިއަދު އާންމުކުރި ވީޑިއޯއަކުންނެވެ. އެގޮތުން އެމެރިކާގެ އަސްކަރިއްޔާއިން ވަނީ އެބޯޓަށް ސަބްމެރިންގެ ޓޯޕީޑޯއަކުން ހަމަލާދޭ މަންޒަރާއި ހަމަލާއަށްފަހު ބޯޓަށް ބޮޑެތި ގެއްލުންތަކެއް ލިބިގެންދާ މަންޒަރު ފެންނަ ވީޑިއޯ އެއް އާންމުކޮށްފައެވެ.

އެމެރިކާއިން ހަމަލާދިނީ ލަންކާއާއި މާދުރުނޫން ސަރަހައްދެއްގައި އިންޑިއާ ކަނޑުގައި އޮތް އީރާނުގެ ހަނގުރާމަ މަތީ މަނަވަރު އައިރިސް ޑެނާއަށެވެ.

އެމެރިކާގެ އަސްކަރީ ސަބްމެރިންއަކުން ދިން ހަމަލާއަކާ ގުޅިގެން ލަންކާގެ ދެކުނު އައްސޭރީގައި އަޑިއަށް ދިޔަ އީރާނުގެ މި މަނަވަރުން މިހާތަނަށް 80 ވަރަކަށް ހަށިގަނޑު ފެނިފައިވާ ކަމަށް ލަންކާގެ ފޮރިން މިނިސްޓަރުގެ ނައިބު އަރޫން ހެމަޗަންދްރާ ވަނީ ވިދާޅުވެފައި އެވެ.

އެ ހާދިސާއާ ގުޅޭ ގޮތުން ވާހަކަ ދައްކަވަމުން ޑެޕިއުޓީ މިނިސްޓަރު ވިދާޅުވީ މި ހަމަލާއާއި ގުޅިގެން ލަންކާގެ ކަނޑުގެ ސަރަހައްދުގައި ސާޗް އެންޑް ރިކަވަރީ އޮޕަރޭޝަންތައް ކުރިއަށްދާ ކަމަށެވެ. މިހާދިސާ ހިނގި އިރު އެ މަނަވަރުގައި 180 އެއްހާ ފަޅުވެރިން ތިއްބެވެ. ކަމާބެހޭ ފަރާތްތަކުން ބުނާ ގޮތުގައި 100 އަށް ވުރެ ގިނަ އިރާނު ސިފައިން މަރުވެދާނެ ކަމުގެ ބިރު އޮތްއިރު، އިތުރު ބައެއް ސިފައިން އަދިވެސް ހޯދުމުގެ މަސައްކަތްދަނީ ކުރަމުންނެވެ.

ލަންކާ ކަނޑުގެ ސިފައިން ސަލާމަތްކުރި އީރާނުގެ 32 ސިފައިން ލަންކާއަށް ގެނެސް، ފަރުވާއަށް ކަރަޕިޓިޔާ ޓީޗިން ހޮސްޕިޓަލުގައި ވަނީ އެޑްމިޓްކޮށްފައެވެ.