ގަތަރުގައި ތިބި އެމެރިކާ ރައްޔިތުން ވީ އެންމެ އަވަހަކަށް އެގައުމުން ނުކުތުމަށް އަމުރުކޮށްފި

ގަތަރުގައި ތިބި އެމެރިކާ ރައްޔިތުން ވީ އެންމެ އަވަހަކަށް އެގައުމުން ނުކުތުމަށް އެމެރިކާގެ ސްޓޭޓް ޑިޕާޓްމެންޓުން އަމުރުކޮށްފި އެވެ.

ގަތަރުގައި ހުންނަ އެމެރިކާ އެމްބަސީން މިއަދު ނެރުނު އެޑްވައިޒަރީއެއްގައި ބުނީ ގަަތަރުގައި މިވަގުތު ތިބި އެމެރިކާގެ ހުރިހާ ރައްޔިތުންވެސް ވީ އެންމެ އަވަހަކަށް އެގައުމު ދޫކޮށް ދާން އެދޭ ކަމަށެވެ. އެގޮތުން މިއީ މެދުއިރުމަތީގެ މަޝްރަހު އިތުރަށް ގޯސްވަމުންދާތީ އެންގި އެންގުމެއްގެ ގޮތުގައިވެސް އެމްބަސީން ވަނީ ބުނެފައި އެވެ.

އެމެރިކާގެ ސްޓޭޓް ޑިޕާޓްމެންޓުން އިއްޔެ ވަނީ ހަނގުރާމައިގެ ނުރައްކާ ބޮޑުވަމުންދާތީ ކުއްލި ހާލަތުގައި ނޫން ގޮތަކަށް ގަތަރުގައި މަޑުކުރަންޖެހޭ މުވައްޒަފުން ފިޔަވައި އެމެރިކާ ސަރުކާރުގެ މުވައްޒަފުންނާއި އެމީހުންގެ އާއިލާގެ މެމްބަރުން ގަތަރުން ފުރައިގެން ދިއުމަށް އަމުރުކޮށްފަ އެވެ. އަދި މިއަދު ނެރުނު އަމުރަކީ ބާކީ އެގައުމުގައި އެކި ބޭނުންތަކަށް ތިބި އެމެރިކާ ރައްޔިތުންނަށް ނެެރެފައިވާ އަމުރެކެވެ.

އެމްބަސީގެ އެޑްވައިޒަރީގައި އިތުރަށް ބުނީ ޤަތަރުގެ ވައިގެ ސަރަހައްދާއި ކަނޑުގެ ރޫޓްތައް އަދިވެސް ބަންދުކޮށްފައި ހުރި ނަމަވެސް ސައުދީ އަރަބިއްޔާއަށް ދާ ސަލްވާ ލޭންޑް ބޯޑަރ ކްރޮސިންގ މިވަގުތު ހުޅުވާފައި ހުރި ކަމަށާއި ގަތަރުން ބޭރުވުމަށް އެ ބޯޑަރު ބޭނުންކުރަން އެދޭ ކަމަށެވެ.