މެދުއިރުމަތީގެ ހަނގުރާމަ: ރައީސުލްޖުމްހޫރިއްޔާ، ގަތަރުގެ އަމީރަށް ފޯނުން ގުޅުއްވައި ޙާލަތު އޮޅުންފިލުއްވައިފި

މިހާރު މެދުއިރުމަތީގައި ކުރިޔަށްދާ ކުރިމަތިލުންތަކާއި ގުޅިގެން ރާއްޖޭގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ގަތަރުގެ އަމީރު ޝައިޚް ތަމީމް ބިން ހަމަދު އަލް ޘާނީއަށް ފޯނުން ގުޅުއްވައި އެގައުމުގެ ޙާލަތު އޮޅުއްފިލުއްވައިފި އެވެ.

ގަތަރުގެ ނޫހެއް ކަމަށްވާ ދަ ޕެނިންސިއުލާ ގަތަރުން ރިޕޯޓުކުރާ ގޮތުގައި ރާއްޖޭގެ ރައީސް ޑރ މުއިއްޒު އަމީރު ޝައިޚް ތަމީމް ބިން ހަމަދު އަލް ޘާނީއަށް ގުޅުއްވީ މިއަދު ގަތަރުގެ ގަޑިން މިއަދު ހެނދުނުގެ ވަގުތެއްގައި އެވެ.

އެގޮތުން މި ފޯނު ކޯލުގައި ރައީސް މުއިއްޒު ވަނީ އީރާނުން ގަތަރަށް ދެމުން އަންނަ ހަމަލާތަކާއި ގުޅިގެން ގަތަރުގެ ހާލަތު އޮޅުންފިލުއްވާފައި އެވެ. އަދި އިރާނުގެ މި ހަމަލާތައް ކުށްވެރިކޮށް، ގަތަރު ދައުލަތަށް ދިވެހި ސަރުކާރުން ފުރިހަމައަށް ތާއީދުކުރާ ކަމުގެ ޔަގީންކަންވެސް ދެއްވާފައި އެވެ.

ގަތަރުގެ އަމީރު ޝައިޚް ތަމީމް ބިން ހަމަދު އަލް ޘާނީ ވަނީ މިހާލަތުގައި އެގައުމުގެ ހާލަތު ބެއްލެވުމަށް ރައީސް މުއިއްޒު އިސްނެންގެވީތީ އެކަމަށް އިޚްލާޞްތެރި ޝުކުރުއަދާކުރައްވައި މިއީ ދެގައުމުގެ ގާތް ގުޅުމާއި އެއްބައިވަންތަކަށް އޮތް މިންވަރު ފެންނަ ކަމެއް ގޮތުގައި ފާހަގަކުރައްވާފައި އެވެ.

އަދި ދެބޭފުޅުން ވަނީ މެދިއިރުމަތީގެ ސަލާމަތާއި ހަމަޖެހުމުގެ މުހިންމުކަމަށާއި ގުޅޭގޮތުން މަޝްވަރާކުރައްވައި އާންމު ހަނގުރާމަ ހުއްޓާލުމަށް އެންމެން ގުޅިގެން މަސައްކަތްކުރުމާއި ގުޅޭގޮތުންވެސް މަޝްވަރާކުރައްވާފައި އެވެ.