މެދުއިރުމަތީގެ ހަނގުރާމަ: ރާއްޖޭއިން ނުފުރި ތާށިވެފައި ތިބި ފަތުރުވެރިންނަށް ވިސާގެ މުއްދަތު އިތުރުކޮށްދޭން ނިންމައިފި

މިހާރު މެދުއިރުމަތީގައި ފެށިފައިވާ ހަނގުރާމައާއި ގުޅިގެން ރާއްޖޭގައި ނުފުރި ތާށިވެފައި ތިބި ފަތުރުވެރިންނަށް ވިސާގެ މުއްދަތު އިތުރުކޮށްދިނުމަށް އިމިގްރޭޝަނުން ނިންމައިފި އެވެ.

އިމިގްރޭޝަނުން ދާދި ދެންމެ އަކު ބުނީ ދަތުރުފަތުރުގެ ނިޒާމަށް މިވަގުތު ކުރިމަތިވެފައިވާ ބުރޫތަކުގެ ސަބަބުން، ދަތުރުކުރުމުގައި ދަތިތަކާ ކުރިމަތިލާންޖެހިފައިވާ ފަތުރުވެރިންނަށް ދޫކޮށްފައިވާ ވިސާގެ މުއްދަތު އިތުރުކުރުމަށް މިހާރު ނިންމާފައިވާ ކަމަށެވެ.

އެގޮތުން މި ލުއި ދޭން ނިންމާފައިވަނީ ދަތުރުފަތުރުގެ ނިޒާމަށް މިވަގުތު ކުރިމަތިވެފައިވާ ބުރޫތަކުގެ ސަބަބުން ރާއްޖެއަށް ދަތުރުކުރާ ބައެއް ފްލައިޓުތައް ކެންސަލްވެ ރާއްޖޭގައި މިވަގުތު ތިބި ފަތުރުވެރީންނަށް ވިސާގެ މުއްދަތު ހަމަވުމުގެ ކުރިން ފުރޭނެ އިންތިޒާމު ނެތް ފަރާތްތަކަށެވެ. އެގޮތުން ވިސާގެ މުއްދަތު އިތުރުކުރުމަށް އިމިގްރޭޝަންގެ މައި ޕޯޓަލް، އިމުގާ މެދުވެރިކޮަށް ހުށަހެޅޭނެ ކަމަށް އެއިދާރާއިން ވަނީ ބުނެފައި އެވެ.

އިރާނާއި އިސްރާއީލް އަދި އެމެރިކާއާއި ދެމެދު މިދިޔަ ހޮނިހިރު ދުވަހު ފެށުނު ހަނގުރާމައާއި ގުޅިގެން މެދުއިރުމަތީގެ ގިނަ ގައުމުތަކެއްގެ ވައިގެ ސަރަހައްދުތައް ވަނީ މުއްދަތެއް ނެތް ގޮތަށް ބަންދުކޮށްފައެވެ. އޭގެ ތެރޭގައި ރާއްޖެއަށް އެންމެ ގިނައިން ފަތުރުވެރިން ޓްރާންސިޓު ކޮށްގެން ދަތުރުކުރާ ޔޫއޭއީ ހިމެނެއެވެ. މިއާއިއެކު މެދުއިރުމަތީގެ ހުރިހާ އެއާލައިނެއްހެން ހުއްޓުމަކަށްވެސް ވަނީ އައިސްފައި އެވެ.

މި ކުއްލި ހަނގުރާމައާއިއެކު ރާއްޖޭގައި ގިނަ އަދަދެއްގެ ފަތުރުވެރިން މިހާރުވެސް ފުރޭނެ ގޮތް ނުވެފައި ތިބި އިރު ސަރުކާރުން ދަނީ އެފަރާތްތަކަށް އެހީތެރިކަން ފޯރުކޮށްދެމުންނެވެ.