މިއަދު ސުކޫކު ދައްކަން ޖެހުނަސް ދެއްކޭނެ ފައިސާ ދައުލަތުގައި އެބަހުރި - ރައީސް

ސުކޫކަށް ދައްކަންޖެހޭ ފައިސާ މިއަދު ދައްކަން ޖެހުނު ކަމުގައިވީ ނަމަވެސް އެފައިސާ ދެއްކޭނެ ގޮތް ދައުލަތުގައި ހުރި ކަމަށް ރައީސުލްޖުމްހުރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ހާމަކުރެއްވީ ނޫސްވެރިންނާއި ބައްދަލުކުރެއްވުމަށް މިހާރު ރައީސް އޮފީހުގައި ކުރިޔަށްދާ ނޫސްވެރިންގެ ބައްދަލުވުމުގައި އެވެ.

ނޫސްވެރިންގެ ބައްދަލުވުމުގައި ރާއްޖޭގެ މާލީ ހާލަތާއި ގުޅޭގޮތުން ރައީސް މުއިއްޒު ވިދާޅުވީ ސުކޫކު ދެއްކުމަށްޓަކައި 650 މިލިޔަން ޑޮލަރަށްވުރެ ގިނަ ފައިސާ ރައްކާކޮށްފައި އެބަހުރިކަމަށާއި އަދި ރާއްޖޭގެ ގްރޮސް ރިޒާވްގައި 1.27 ބިލިޔަން އެމެރިކާ ޑޮލަރު އެބަހުރި ކަމަށާއި މިއީ ރާއްޖޭގެ ތާރީޚުގައި ދުވަހަކުވެސް ގްރޮސް ރިޒާވް މައްޗަށް ނުދާ މިންވަރެއް ކަމަށް ރައީސް ވިދާޅުވިއެވެ.

އަދި ރޭގެ ނިޔަލަށް އެސްޑީއެފްގައި 320 މިލިއަނަށް ޑޮލަރަށްވުރެ ގިނަ ފައިސާ ރައްކާކޮށްފައި ހުރިކަންވެސް ރައީސް ފާހަގަކުރެއްވި އެވެ.

"ޔޫސަބަލް ރިޒާވުގަ 330 މިލިޔަން ޑޮލަރަށްވުރެ ގިނަ ފައިސާ އެބަހުރި، އެހެންވީމަ ޖުމްލަ 650 މިލިޔަން ޑޮލަރަށްވުރެ ގިނަ ފައިސާ އެބަހުރި ރައްކާކޮށްފައި،" ރައީސް ވިދާޅުވިއެވެ.

ރައީސް ވިދާޅުވީ މިއަހަރަށް ބޭނުންވާ އިތުރު ފައިސާ ހޯދުމަށްވެސް ގިނަ މަސައްކަތްތަކެއް ކުރެވެމުންދާ ކަމަށާއި، ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމަށެވެ.

އެގޮތުން އިތުރު ފައިސާތައް ހޯދުމަށް ވަރަށް ކާމިޔާބު މުޢާމަލާތްތައް ކުރިއަށްދާކަން ފާހަގަކުރައްވައި ރައީސް ވިދާޅުވީ އެމަޝްވަރާތައް މިހާރު ހުރީ ފަހު ސްޓޭޖުގައި ކަމަށެވެ.

ދަރަނި ދެއްކުމަށް އެއްވެސް ކަންބޮޑުވުމެއް ނެތްކަން ހާމަކުރައްވައި ރައީސް ވަނީ އިޤްޞިދު މެނޭޖްކުރަމުން ދަނީ ބޭރަށް ދައްކަން ޖެހޭ ދަރަނި އާއި އެތެރޭގެ ދަރަނި ދެއްކޭގޮތަށްކަމުގައި ފާހަގަކުރައްވާފައި އެވެ.