-
އިއްޔެ ހަވީރު ހިޔާ ޓަވަރު 5 ގައި އަލިފާނުގެ ހާދިސާއެއް ހިނގީ ވައިގޮޅިއެއްގައި ހުރި އޭސީ އައުޓްޑޯއެއްގައި އަލިފާން ރޯވެގެން ކަމަށް ސިފައިން ހާމަކޮށްފި އެވެ.
މި ހާދިސާއާއި ގުޅޭ ތަފްސީލް ހާމަކުރަމުން ސިފައިން ބުނީ މި ހާދިސާގެ މަޢުލޫމާތު ރޭ 18:33 ހާއިރު އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަނަށް ލިބުމާއެކު އެ ފަޔަރ ސްޓޭޝަނުގެ ފަޔަރފައިޓަރުން ވަނީ އެ ސަރަހައްދަށް ގޮސް ހަރަކާތްތެރިވާން ފަށާފައިވާ ކަމަށެވެ.
އަދި އެ ސަރަހައްދަށް ފަޔަރ ފައިޓަރުންދިޔައިރު އެ ޓަވަރުގައި ވަރަށް ބޮޑަށް ދުން ހުރުމުން އާއްމުން ރައްކާތެރި ހިސާބަށް ގެންދިއުމާއި ދުން ބޭރުކުރުމުގެ މަސައްކަތް ހުޅުމާލޭ ފަޔަރ ސްޓޭޝަނުގެ ފަޔަރފައިޓަރުން ކޮށްފައިވާކަންވެސް ވަނީ ހާމަކޮށްފައެވެ.
ސިފައިން ބުނީ މި ހާދިސާގައި އަލިފާން ރޯވެފައިވަނީ އެ ޓަވަރުގެ 9ވަނަ ފްލޯއާއި 14ވަނަ ފްލޯއާއި ދެމެދުގެ ވައިގޮޅީގައި ހުރި އެސީ އައުޓްޑޯއެއްގައި ކަމަށެވެ. އަދި މި ހާދިސާގެ ސަބަބުން އެ ޓަވަރުގެ ވައި ގޮޅިގައި ހުންނަ ފެންހޮޅިތަކަށް ވަނީ ބޮޑެތި ގެއްލުންތަކެއް ލިބިފައިކަން ސިފައިންވެސް ވަނީ ކަށަވަރުކޮށްދީފައި އެވެ.
މި ހާދިސާގައި އެއްވެސް މީހަކަށް އަނިޔާވިކަމުގެ މަޢުލޫމާތެއް ލިބިފައެއް ނުވެއެވެ.
ފަހުގެ
