އޭދަފުށީގައި ޕިކަޕަކުން ޖެހި އެކްސިޑެންޓުވި މީހާ ނިޔާވެއްޖެ

އޭދަފުށީގައި ޕިކަޕަކުން ޖެހި އެކްސިޑެންޓުވި މީހާ ނިޔާވެއްޖެ އެވެ.

ފުލުހުންގެ މީޑިއާ އޮފިޝަލުން ވިދާޅުވީ ބ އޭދަފުށީ ރޯޝަނީ މަގާއި ދިލްބަހާރު ހިނގުން ގުޅޭ ކަންމަތީ ހިނގާފައި ދިޔަ މީހެއްގެ ގައިގައި ޕިކަޕަކުން ޖެހި އެކްސިޑެންޓުވެފައިވާ މައްސަލައެއް މިމަހުގެ 15 ވަނަ ދުވަުހުގެ ރޭ 19:57 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.

އެގޮތުން މި އެކްސިޑެންޓުގައި ހިނގާފައި ދިޔަ މީހާއަށް އަނިޔާވެގެން ބ އަތޮޅު ހޮސްޕިޓަލަށް ފަރުވާ ދޭން ގެންދެވި އިތުރު ފަރުވާއަށް މާލެ ގެނެސް އައިޖީއެމް ހޮސްޕިޓަލުގައި ފަރުވާދެމުން ދަނިކޮށް މިއަދު ނިޔާވެފައިވާކަން މީޑިއާ އޮފިޝަލްވަނީ ކަށަވަރުކޮށްދީފައި އެވެ. އެގޮތުން ނިޔާވެފައިވަނީ 82 އަހަރުގެ ދިވެހި ފިރިހެނެކެވެ.

މި އެކްސިޑެންޓާއި ގުޅިގެން މިޑިއާ އޮފިޝަލް ވިދާޅުވީ ޕިކަޕް އަޕް ދުއްވި މީހާ ފުލުހުންގެ ބެލުމުގެ ދަށަށް ގެނެވުނު ކަމަށާއި އެއީ 62 އަހަރުގެ ދިވެހި ފިރިހެނެއް ކަމަށެވެ. ނަމަވެސް އެމީހާ އަދިވެސް ހުރީ ފުލުހުންގެ ބަންދުގައިކަން ކަށަވަރެއް ނުވެއެވެ.

ފުލުހުން މި މައްސަލަ އިތުރަށް ތަހުގީގުކުރަންދާކަން ހާމަކުރި ނަމަވެސް އިތުރު ތަފްސީލެއް ދީފައި ނުވެއެވެ.