ހޮވަންވީ ރެއާއި ދުވާލު ނިދި ނަންގަވައިލައްވައިގެން ރައްޔިތުންގެ ހައްގުގައި މަސައްކަތް ކުރައްވާ ރައީސަަކަށް އެއްބާރުލުންދޭނެ ކައުންސިލެއް!

ކުރިޔަށް އޮތް ކައުންސިލް އިންތިހާބުގައި ރެއާއި ދުވާލު ނިދި ނަންގަވައިލައްވައިގެން ރައްޔިތުންގެ ހައްގުގައި މަސައްކަތް ކުރައްވާ ރައީސަަކަށް އެއްބާރުލުންދޭނެ ކައުންސިލެއް ހޮވުން މުހިންމު ކަމަށް ފަސްޓް ލޭޑީ ސާޖިދާ މުހައްމަދު ވިދާޅުވެއްޖެ އެވެ.

އެކަމަނާ މިފަދައިން ވިދާޅުވީ މާލެ ސިޓީގެ މާފަންނު ދެކުނު ދާއިރާގެ ކައުންސިލު ގޮނޑިއަށް ޕީއެންސީގެ ޓެކިޓުގައި ވާދަކުރައްވާ ކެންޑިޑޭޓާއި މާލޭގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އެ ދާއިރާ ގޮނޑިއަށް ވާދަކުރައްވާ ކެންޑިޑޭޓުގެ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ދެއްކެވި ވާހަކަފުޅުގައި އެވެ.

އެކަމަނާ ވިދާޅުވީ ސަރުކާރާ ދެކޮޅަށް މަސައްކަތްކުރުމުގެ ވިސްނުމުގައި މަގާމަށް އަންނަ ބަޔަކު، މަގާމުގައި ތިބެގެން ސަރުކާރަށް އެއްބާރުލުން ނުދޭނަމަ، އެމީހުންގެ ފަރާތުން ރައްޔިތުންނަށް އެއްވެސް ފައިދާއެއް ނުލިބޭނެ ކަމަށެވެ. ރާއްޖޭގައި ހުރި އިޖުތިމާއީ އިގުތިސާދީ މައްސަލަތައް ހައްލުކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާ ކަން ފާހަގަކުރައްވައި ފަސްޓް ލޭޑީ ވިދާޅުވީ އެ މައްސަލަތައް ހައްލުކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އުދަގޫ އެތައް ނިންމެވުމެއް ނިންމަވަމުންދާއިރު، އެމަނިކުފާނާއި ސަރުކާރަށް އެހީތެރިވެދޭނެ ބަޔަކު ކައުންސިލުތަކަށް ނުހޮވައިފިނަމަ އެކަމުގެ ގެއްލުން ހުރިހާ ރައްޔިތުން ތަހައްމަލުކުރާނެ ކަމަށެވެ.

ކައުންސިލަކީ ރައްޔިތުންގެ އިހުސާސްތައް އެންމެ ކައިރިން ދެނެގަނެ، އެންމެ ގާތުން ރައްޔިތުންނަށް ހިދުމަތް ފޯރުކޮށްދެވޭނެ މުއައްސަސާކަން ފާހަގަކުރައްވަމުން ސާޖިދާ ވިދާޅުވީ ރައްޔިތުންގެ ކަންބޮޑުވުންތަކާއި ބޭނުންތައް ސީދާ ސަރުކާރާ ހަމައަށް ގެނެސްދެވޭނެ ބަޔަކު ކައުންސިލުތަކުގައި ތިބުމަކީ އެކަމުން ރައްޔިތުންނަށް ވަރަށް ބޮޑަށް ފައިދާކުރާނެ ކަމެއް ކަމަށެވެ.

މާލޭގެ މޭޔަރުކަމަށް ވެރިކަން ކުރާ ޕީއެންސީގެ ޓިކެޓުގައި ވާދަކުރައްވާ މޫސާ އަލީ ޖަލީލުއަށް ނިސްބަތްކުރައްވައި ނޮވެންބަރު 3 1988 ގައި މޫސާ އަލީ ޖަލީލް ވެވަޑައިގެންނެވި ގުރުބާނީއާއި ދެއްކެވި ހިތްވަރު ފާހަގަކުރައްވަމުން ފަސްޓް ލޭޑީ ވިދާޅުވީ އެފަދަ ގުރުބާނީއެއް ގައުމަށްޓަކައި ވެވަޑައިގަތް ބޭފުޅެއްގެ ހިތްޕުޅުގައި ގައުމަށް އޮންނާނެ ލޯތްބާއި، ގައުމަށްޓަކައި މަސައްކަތްކުރައްވާނެ ގޮތް އެއްވެސް މީހަކަށް ނޯޅޭނެ ކަމަށެވެ.

ފަސްޓް ލޭޑީ ވާހަކަފުޅު ނިންމަވައިލެއްވީ، ކުރިން އެކަމަނާގެ ވާހަކަފުޅުގައި ފާހަގަކުރެއްވި ކަންކަމަށް ރިއާޔަތްކޮށް، ކޮންގުރެސް ޕާޓީގެ މެންބަރުންގެ އިތުރަށް ވަކި ޕާޓީއަކަށް ނިސްބަތްނުވާ މީހުންނާއި ވާދަވެރި ޕާޓީތަކުގެ އާއްމު މެންބަރުންވެސް ކުރިއަށް އޮތް ލޯކަލް ކައުންސިލު އިންތިހާބުގައި ކޮންގްރެސް ޕާޓީގެ ކެންޑިޑޭޓުންނަށް ވޯޓު ދިނުމަށް އިލްތިމާސްކުރައްވަމުންނެވެ.