ދިރާސީ އާ އަހަރުގެ ކިޔެވުން ރާއްޖޭގެ ހުރިހާ ސްކޫލެއްގައި ވެސް ފަށައިފި

ދިރާސީ އާ އަހަރުގެ ކިޔެވުން ރާއްޖޭގައި ކިޔަވައިދޭ ހުރިހާ ސްކޫލެއްގައި މިއަދު ފަށައިފިއެވެ.ދިރާސީ އަހަރުގެ ކިޔެވުން މިއަދު ފެށިއިރު ސަރުކާރުގެ 218 އެއްހާ ސްކޫލްގައި 77000އަށްވުރެ ގިނަ ދަރިވަރުން ތަޢުލީމް ހާސިލްކުރަމުން ދާނެއެވެ.

ދިރާސީ އާ އަހަރާ ދިމާކޮށް ހުޅުމާލެ ދެވަނަ ފިޔަވަހީގައި ޒަމާނީ ފެންވަރުގެ ބޮޑު ސްކޫލެއް ހުޅުވައި މިއަދު ވަނީ ފަށާފައެވެ. "ޝަހީދު ޢަލީ ސްކޫލް"ގެ ނަމުން ނަން ދެވިފައިވާ މި ސްކޫލަކީ މާލެ ސަރަހައްދުގައި ތަރައްގީކުރެވުނު އެންމެ ޖާގަ ތަނަވަސް ޒަމާނީ އެއް ސްކޫލެވެ. މިއަދު ބޭއްވުނު ހާއްސަ ރަސްމިއްޔާތެއްގައި މި ސްކޫލް ހުޅުވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.

School

ދިރާސީ އަހަރު ކިޔެވުން ފެށުމަށް ތަޢުލީމީ ވުޒާރާއިން ވަނީ ގިނަ މަސައްކަތްތަކެއް ކޮށްފައެވެ. އެގޮތުން ދަރިވަރުންނަށް ބޭނުންވާ ޓެކްސްޓް ފޮތްތައް ސްކޫލްތަކަށް ފޮނުވުމުގެ މަސައްކަތް މިދިޔަ ޑިސެންބަރު މަހުގެ ތެރޭގައި މިނިސްޓްރީން ވަނީ ފަށާފައެވެ. އަދި މުދައްރިސުން ހަމަކުރުމާއި، އުމްރާނީ ތަރައްގީގެ ގިނަ މަސައްކަތްތަކެއްވެސް ވަނީކުރިއަށް ގެންގޮސްފައެވެ.

މިއަހަރުގެ ދިރާސީ ކަލަންޑަރުގައިވާ ގޮތުން މި ފެށޭ ރަމަޟާން މަހުގެ ފުރަތަމަ ހަފްތާގައި ކިޔަވައިދިނުމަށްފަހު ދަރިވަރުންނަށް ސްކޫލް ބަންދުވާނެ އެވެ. އަދި ފިތުރު އީދު ބަންދަށް ފަހު އަލުން ކިޔެވުން ފަށާނީ މާޗްމަހުގެ 23 ވަނަ ދުވަހުއެވެ. ފުރަތަމަ ޓާމްގެ ކިޔެވުން ނިމުމަށްފަހު ދަރިވަރުންނަށް ބަންދުވާނީ ޖުލައި މަހުގެ 14 ވަނަ ދުވަހުން ފެށިގެން އޮގަސްޓް މަހުގެ ފުރަތަމަ ދުވަހާހަމައަށެވެ. އަދި ދެވަނަ ޓާމުގެ ކިޔެވުން އޯގަސްޓްމަހުގެ 2 ވަނަ ދުވަހު ފަށާއިރު އަހަރުގެ ކިޔެވުން ނިންމާ ދަރިވަރުންނަށް ބޮޑު ޗުއްޓީ ލިބޭނީ 18 ޑިސެންބަރުން 12 ޖަނަވަރީ 2027އާ ހަމައަށެވެ.