މާލޭ ވޮކޭޝަނަލް ހައި ސްކޫލް ރަސްމީކޮށް ހުޅުވައި, ފުރަތަމަ ބެޗްގެ ކިޔެވުން ފަށައިފި

މާލޭ ވޮކޭޝަނަލް ހައި ސްކޫލް ރަސްމީކޮށް ހުޅުވައި ސްކޫލުގެ ފުރަތަމަ ބެޗްގެ ކިޔެވުން ފަށައިފިއެވެ.

މާލޭ ވޮކޭޝަނަލް ހައި ސްކޫލް ހުޅުވުމުގެ ރަސްމިއްޔާތު ޝަރަފްވެރިކޮށްދެއްވީ ތަޢުލީމީ ވަޒީރު މިނިސްޓަރ ޑރ. އިސްމާޢީލް ޝަފީޢުއެވެ.

މިއީ، ސާނަވީ ތަޢުލީމު ނިންމާ ދަރިވަރުންގެ ތެރެއިން ފަންނީ އަދި މަސައްކަތްތެރިކަމުގެ ދާއިރާތަކުން ކުރިއަށް ދިއުމަށް ޝައުޤުވެރިވާ ދަރިވަރުންނަށް އަމާޒުކޮށްގެން ހުޅުވި ސްކޫލެކެވެ.

މި ސްކޫލް ހުޅުވިގެން ދިއުމާއެކު މަތީ ސާނަވީ ތަޢުލީމުގެ ޕާތްވޭއެއް އިތުރުވެ، ޢަމަލީ އަދި ސިނާޢީ ދާއިރާއަށް ގުޅޭ ތަމްރީނަށް ޝައުޤުވެރިވާ ދަރިވަރުންނަށް ފުރުޞަތުތައް އިތުރުވެގެންދާނެއެވެ.

މި ވޮކޭޝަނަލް ހައި ސްކޫލުން ކިޔަވާ ނިންމާ ދަރިވަރުންނަށް، ޔުނިވަރސިޓީތަކުގައި ޑިޕްލޮމާ އަދި ޑިގްރީ ފެންވަރުގެ ކޯސްތަކުގައި ބައިވެރިވުމުގެ ފުރުޞަތު ލިބިގެންދާނެއެވެ. އަދި ކޯސް ނިންމުމަށްފަހު ވަޒީފާއަކަށް ދިއުމަށް އިޚްތިޔާރުކުރާ ދަރިވަރުންނަށް، އެ ފުރުޞަތު ވެސް ފަހިވެގެންދާނެ ކަމަށް މިނިސްޓަރ ޑރ. އިސްމާޢީލް ޝަފީޢު ވަނީ ވިދާޅުވެފައެވެ.

ވޮކޭޝަނަލް ހައި ސްކޫލްގެ ކިޔެވުން ކުރިއަށްގެންދިޔުމަށް ހަމަޖެހިފައިވަނީ އެއްދަންފަޅިއަށެވެ. މީގެ އިތުރުން ހައި ސްކޫލްގެ މޮޑެލްއަށް ކިޔަވައިދޭ މިސްކޫލްގައި އެޗް.އެސް.ސީގެ ދެ މާއްދާ ކަމުގައިވާ އިސްލާމް އަދި ދިވެހި ކިޔަވައިދިނުމަށް ހަމަޖެހިފައެވެ.

މަތީ ސާނަވީ ތަޢުލީމު ހާސިލުކުރާ ދަރިވަރުންގެ އަދަދު އިތުރުކޮށް، ތަފާތު ޕާތްވޭތަކުގެ ޒަރިއްޔާއިން ދަރިވަރުންނަށް މަތީ ސާނަވީއަށް ކިޔެވުމުގެ ފުރުޞަތުތައް އިތުުރުކުރުމަކީ މިނިސްޓްރީގެ މުހިންމު ސިޔާސަތެކެވެ.

އެގޮތުން މިއަދު ހުޅުވިގެން މިދިޔަ ސްކޫލާއެކު ވޮކޭޝަނަލް ޕާތްވޭއިން ކުރިއަށްދިއުމަށް ބޭނުންވާ ދަރިވަރުންނަށް މިވަނީ އެ މަގުފަހިވެފައެވެ. އަދި އެކެޑެމިކް ޕާތްވޭއިން ކުރިއަށްދާން ބޭނުންވާ ކުދިންނަށް އެ ފުރުޞަތު ފަހިކުރުމަށްޓަކައި 3 މާއްދާއިން ފާސްވާ ދަރިވަރުންނަށް ވެސް މަތީ ސާނަވީ އަށް ވަދެވޭ ގޮތަށް ސިޔާސަތަށް ވަނީ ބަދަލުގެނެވިފައެވެ.

އަދި ސްކޫލުތަކުގެ ޖާގަ އިތުރުކުރުމުގެ ގޮތުން މާލޭގައި ހުރި ސީއެޗްއެސްއީ އަލުން ހުޅުވުމާއި، އަތޮޅުތެރޭގެ ބައެއް ސްކޫލުތަކުގައި އޭލެވެލް އަށް ކިޔަވައިދިނުމުގެ ޕައިލެޓް ޕްރޮގްރާމްތައް ވެސް ކުރިއަށްދާ ކަމަށް ތައުލީމީ ވުޒާރާއިން ހާމަކުރެއެވެ.