ސްޓޯރޭޖް ފެސިލިޓީތައް ޤާއިމުކޮށް ވިޔަފާރިތަކަށް ހެޔޮ އަގުގައި ގުދަން ކުރެވޭނެ ގޮތް ހަދައިދެނީ

މާލެ ސަރަޙައްދާއި ކުޅުދުއްފުށި ސިޓީ އަދި އައްޑޫ ސިޓީގައި ކުދި އަދި މެދު ފަންތީގެ ވިޔަފާރިތަކަށް ޚާއްސަކޮށްގެން ސްޓޯރޭޖް ފެސިލިޓީތައް ޤާއިމުކޮށް ހެޔޮ އަގުގައި މުދާ ރައްކާކޮށް ގުދަން ކުރެވޭނެ އިންތިޒާމު ހަމަޖެއްސުމުގެ މަސައްކަތް ފަށައިފި އެވެ.

އިޤްތިސާދީ ތަރައްޤީއާއި ވިޔަފާރިއާ ބެހޭ ވުޒާރާއިން މިއަދު ނެރުނު ބަޔާނެއްގައި ބުނީ ކުރިއަށް އޮތް ދެ އަހަރަކީ ކުދި އަދި މެދު ފަންތީގެ ވިތަފާރިތައް ކުރިއެރުވުމަށް ޚާއްސަ ފިޔަވަޅުތަކެއް ތަންފީޒު ކުރައްވާނެ ދެ އަހަރުގެ ގޮތުގައި ކަނޑައަޅުއްވައި އަންނަ ޖަނަވަރީ މަހުގެ އެއްވަނަ ދުވަހުން ފެށިގެން އެކަންކަން ކުރިއަށް ގެންދިއުމަށް ރައީސުލްޖުމްހޫރިއްޔާ ޑރ މުހައްމަދު ނިންމަވާފައިވާ ނިންމެވުން ތަންފީޒު ކުރެއްވުމަށްޓަކައި ކުދި އަދި މެދު ފަންތީގެ ވިޔަފާރިތަކަށް ލުއި ގޮތްތަކެއް ހަމަޖެއްސެވުމުގެ މަސައްކަތް ސަރުކާރުން ދަނީ ކުރަމުން ކަމަށެވެ.

މިގޮތުން ރައީސް، ކުދި އަދި މެދު ފަންތީގެ ވިޔަފާރިތަކާއެކު ޑިސެންބަރު 17 ގައި ކުރެއްވި ބައްދަލުކުރެއްވުމުގައި ވިޔަފާރިވެރީން ފާހަގަކުރައްވާފައިވާ މައްސަލަތަކުގެ ތެރޭގައި ހިމެނޭ ކަންތައްތަކުގެ ތެރެއިން މާލެ ސަރަޙައްދާއި ކުޅުދުއްފުށި ސިޓީ އަދި އައްޑޫ ސިޓީގައި ކުދި އަދި މެދު ފަންތީގެ ވިޔަފާރިތަކަށް ޚާއްސަކޮށްގެން ސްޓޯރޭޖް ފެސިލިޓީތައް ޤާއިމުކޮށް ހެޔޮ އަގުގައި މުދާ ރައްކާކޮށް ގުދަން ކުރެވޭނެ އިންތިޒާމު ހަމަޖެއްސެވުމުގެ މަސައްކަތް ކުރަމުން ގެންދާކަން އެވުޒާރާއިން މިއަދު ވަނީ ހާމަކޮށްފައި އެވެ.

ހަމައެއާއިއެކު މޯލްޑިވްސް ޕޯޓްސް ލިމިޑެޓް (އެމްޕީއެލް) އިން މުދާ ކުލިއާ ކުރާން މިހާރަށްވުރެ އަވަސް ކުރުމާއި އެ ސަރަޙައްދުގައި ހަރަކާތްތެރިވާ މުދާ އުފުލާ އުޅަނދުފަހަރުގައި ކަންކަން މިހާރަށްވުރެ ހަރުދަނާ ކުރުމުގެ ގޮތުން މިކަންކަން އެ ވުޒާރާއިން ގާތުން ބަލަމުންދާނެ ކަންވެސް ވަނީ ހާމަކޮށްފައި އެވެ.

އެވުޒާރާއިން ނެރުނު ބަޔާނުގައި އިތުރަށް ބުނީ ރައީސް, ކުދި އަދި މެދު ފަންތީގެ ވިޔަފާރިތަކާއެކު ކުރެއްވި ބައްދަލްކުރެއްވުމުގައި ފާހަގަކޮށްފައިވާ ކަންކަމުގެ ތެރެއިން ދިވެހީންނައި ވާރކް ޕާމިޓް ހޯލްޑަރުން ބައިތިއްބުމަށް ޚާއްސަކޮށްގެން ހިންގާ ކޮޓަރި ކުއްޔަށްދޭ ވިޔަފާރިތައް ރަޖިސްޓްރީކޮށް ކޯޓާ ލިބުމުގައި ދިމާވާ ދަތިތައް މިހާރު ޙައްލުކުރެވިފައިވާ ކަމަށެވެ.