އުޒްބެކިސްތާންގެ ސެންޓްރަމް އެއާއިން ރާއްޖެއަށް ޝެޑިއުލް ދަތުރުތައް ފަށައިފި

އުޒްބެކިސްތާންގެ ސެންޓްރަމް އެއާއިން ރާއްޖެއަށް ޝެޑިއުލް ދަތުރުތައް ފަށައިފި އެވެ.

ސެންޓްރަމް އެއާއިން ރާއްޖެއަށް ރަސްމީކޮށް ދަތުރުތައް ފެށީ މިއަދު އެވެ. އެގޮތުން މި އެއާލައިނަށް ހިދުމަތްދޭން ނިންމާފައިވަނީ ވެލާނާ އިންޓަނޭޝަނަލް އެއާޕޯޓުގެ އައު ޕަސެންޖަރ ޓާމިނަލުންނެވެ. މިއާއިއެކު އުޒްބެކިސްތާންގެ ސެންޓްރަމް އެއާ ވެގެން ގޮސްފައިވަނީ އައު ޓާމިނަލުން ހިދުމަތް ދޭންފެށި 28 ވަނަ އެއާލައިންއަށެވެ.

ޓާމިނަލް 1 އިން ސެންޓްރަމް އެއާއަށް ހިދުމަތް ދޭން ފެށުން ފާހަގަކުރުމަށް ޓާމިނަލުގައި މިއަދު ވަނީ ހާއްސަ ރަސްމިއްޔާތެއް ބާއްވައިފައެވެ. ރަސްމިއްޔާތު ޝަރަފުވެރިކޮށްދެއްވީ އެމްއެމްޕީއާރްސީގެ ޗެއާމަން އަބްދުالله ގިޔާސް އާއި އެފްއެސްއެމްގެ މެެނޭޖިންގ ޑިރެކްޓަރު ފާތިމަތު އަޝާންއެވެ.

ރަސްމިއްޔާތުގައި ސެންޓްރަމް އެއާގެ ރާއްޖޭގެ އޭޖެންޓް، އިނާ މޯލްޑިވްސްގެ ވެރިޔާ މުހައްމަދު ފިރާގްއާއި އެމްއޭސީއެލްގެ އިސްވެރިންނާއި އޮފިޝަލުން ބައިވެރިވެވަޑައިގެންނެވިއެވެ.

މިއަދުގެ ރަސްމިއްޔާތުގައި ސެންޓްރަމް އެއާގެ ޗެކިން ކައުންޓަރުތައް ރަސްމީކޮށް ހުޅުވައި, އެ އެއާލައިނުން ފުރި ފަސިންޖަރުންނަށް ވަނީ ހަދިޔާ ދީފައެވެ. އަދި ޓާމިނަލް 1 އަށް ކައިރި ކުރި ސެންޓްރަމް އެއާގެ ފުރަތަމަ ފްލައިޓްއިން ރާއްޖެ އައި ފަސިންޖަރުންނަށް ވަނީ ސަގާފީ ހަރަކާތްތަކާއެކު ހޫނު މަރުހަބާއެއް ކިޔައިފައެވެ.

ސެންޓްރަމް އެއާއިން ރާއްޖެއަށް ދަތުރުކުރުމަށް ހަމަޖެހިފައިވަނީ ކޮންމެ ހަފްތާއެއްގެ އާދީއްތަ ދުވަހު އެވެ.

ސެންޓްރަމް އާއެކު ޓާމިނަލް 1 އިން ހިދުމަތް ދޭން ފެށި އެއާލައިންތަކުގެ އަދަދު ވަނީ 28 އަށް އިތުރުވެފައެވެ. އެމްއޭސީއެލްގެ އަމާޒަކީ ރާއްޖެއަށް ދަތުރުކުރާ ހުރިހާ އެއާލައިނަކަށްވެސް އެންމެ ފުރިހަމަ އަދި އެންމެ މަތީ ފަންތީގެ ހިދުމަތެއް ފޯރުކޮށްދިނުމެވެ.