logoEN
Sto top
ތޫފާނުގައި ލަންކާއިން މަރުވި މީހުންގެ އަދަދު 150 އިން މައްޗަށް!

ތޫފާނުގައި ލަންކާއިން މަރުވި މީހުންގެ އަދަދު 150 އިން މައްޗަށް!

އަހުމަދު ޝުރާއު

logo

11/29/2025, 5:15:57 PM

# ސްރީލަންކާ

-

ތޫފާން ދީތުވާގެ ސަބަބުން ފެން ބޮޑުވުމާއި ބިންގަނޑު ކަނޑައިގެން ދިއުން ފަދަ އެކި ހާދިސާތަކުގައި ސްރީ ލަންކާއިން މަރުވި މީހުންގެ އަދަދު 150 އިން މައްޗަށް އަރައިފި އެވެ.

Wamco

ލަންކާގެ ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ކާރިސާއާއި ގުޅޭ އެންމެ ފަހުގެ މައުލޫމާތު ހާމަކުރަމުން ބުނެފައިވަނީ ކާރިސާގައި މަރުވި މީހުންގެ އަދަދު 153 އަށް އަރާފައިވާ ކަމަށެވެ. އަދި ގެއްލުނު މީހުންގެ އަދަދުވެސް މިވަގުތާއި ހަމައަށް 191 އަށް އަރާފައިވާ ކަމަށެވެ.

ޑީއެމްސީން މިއަދު ލަންކާ ގަޑިން 6:00 ގައި ނެރުނު ބަޔާނުގައި ބުނީ މި ކާރިސާގެ އަސަރު 25 ޑިސްޓްރިކްޓްގެ 217،263 އާއިލާއެއްގެ 774،724 މީހުންނަށް ކޮށްފައިވާ ކަމަށެވެ. އަދި އެގައުމުގެ އެކި ކަންކޮޅުތަކުގައި ގާއިމްކޮށްފައިވާ 798 ސޭފް ސެންޓަރުގައި 27،494 އާއިލާއެއްގެ 100،898 މީހުން މިހާރުވެސް ތިބިކަމަށް ވަނީ ބުނެފައި އެވެ.

ބޯކޮށް ވާރޭވެހި މަގުތައް ހަލާކުވެ، ކަރަންޓާއި މުވާސަލާތީ ހިދުމަތްތައް ކެނޑިގެން ދިޔަ ނަމަވެސް މީހުން ހޯދުމުގެ މަސައްކަތް ދަނީ ކުރަމުންނެވެ. މޫސުން ރަނގަޅުވާން ފެށިނަމަވެސް ކޯރުތައް ބަންޑުންޖަހާލައި ބިންގަނޑަށް އޭގެ އަސަރުކޮށް ބިންގަނޑު ކަނޑައިގެން ދިޔުމުގެ ގިނަ ހާދިސާތަކެއް މިއަދު ލަންކާގެ އެކި ކަންކޮޅުތަކުގައި ދަނީ ހިނގަމުންނެވެ. އަދި ބިންގަނޑު ކަނޑައިގެން ދިޔުމުގެ ފުރުސަތު ބޮޑު ލަންކާގެ އާބާދީތައްވެސް ބޮޑު ބައެއް ސަރަހައްދުތައް ހިމެނޭހެން ގިނަ ސަރަހައްދުތަކެއް އަންނަނީ ހުސްކުރަމުންނެވެ.

މި ތޫފާނުގެ ސަބަބުން ލަންކާގެ ސެންޓްރަލް، ސަބަރަގަމުވާ، ނޯތު ވެސްޓަރން އަދި ނޯތު ސެންޓްރަލް ޕްރޮވިންސްތަކަށް ބޮޑެތި ގެއްލުންތަކެއް ލިބި، އެތައް ހާސް ބަޔަކު ގެދޮރު ދޫކޮށް ދާން ޖެހި، އަސާސީ ހިދުމަތްތަކަށް ބޮޑެތި ގެއްލުންތަކެއް ވަނީ ލިބިފަ އެވެ. ޓްރައި ފޯސަސް، ޕޮލިސް، ޑިޒާސްޓާ މެނޭޖްމަންޓް ސެންޓަރުގެ ޓީމުތަކާއި ވޮލަންޓިއަރުން ދަނީ އެކަހެރި ކޮމިއުނިޓީތަކާ ހަމައަށް ވާސިލުވުމަށް 24 ގަޑިއިރު މަސައްކަތް ކުރަމުންނެވެ.

އަދި މި އޮޕަރޭޝަންތައް އަދިވެސް ކުރިޔަށްދިޔުމާއިއެކު ފެންބޮޑުވުމުގެ ސަބަބުން މަރުވާ މީހުންގެ އަދަދު އިތުރުވާނެ ކަމަށް ކަމާބެހޭ ފަރާތްތަކުން ވަނީ ބުނެފަ އެވެ.

މި ކާރިސާއާއިއެކު އެގައުމު ރައީސް އަނޫރާ ކުމާރަ ޑިސެނަޔަކަ މިއަދު މެންދުރު ވަނީ އެގައުމުގައި ކުއްލި ނުރައްކަލުގެ ހާލަތު އިއުލާނުކުރައްވާފައި އެވެ.

E living
ކޮމެންޓް
E living
ފަހުގެ
HDC